Referral Hospital-ah ni tin mi 200 vel inentir thin

State Referral Hospital, Falkawnah dam lo inentir an pung zel a, OPD card la ni tin mi 200 vel an awm ṭhin a, damlo en turin super specialist doctor-te hun bik neiin an ṭhu ṭhin. State Referral Hospital behchhan hian Mizoram Institute of Medical Education and Researh (MIMER) din tum a ni.

State Referral Hospital hotute hnen aṭanga thu dawn danin, damdawi-in hi medical collge atan siam tum niin, hmanraw ṭha leh thar ber ber hmangin thuam mek zel a ni a; medical collge ni turin blood bank neih a ngaih ang­in, blood bank dinna tur bungrua­te a thleng kim thawkhat tawh.

Intensive Care Unit (ICU) atan pawh bungraw chi hrang hrang a thleng mek zel a; department hrang hrang 15-a hman tur hmanrua leh bungraw chang­tlung tak a thlen belh zel. Anatomy leh Physiology-a hman tur bungrua a thleng kim thawkhat tawh a, Biochemistry pawh 40% vel chah thlen a ni tawh bawk.

State Referral Hospital-ah hian OPD chu zing dar 9 aṭanga tlai dar 3 thleng hawn ṭhin a ni a; chumi hun chhungah vek super speciality clinic - Paediatric surgeon, Plastic surgeon pan theih a ni.

Referral Hospital-a medical college, MIMER din tuma director tur chu Prof. L Fimate, MD, FAIMS, WHO Fellow a ni a; faculty danga professor turte pawh lak belh zel tum a ni.