Rural bank-a thawkte an nuar ṭan

India rama regional rural bank hrang hranga thawkte pawl inzawm khawmna, United Forum of Regional Rural Bank Union (UFRRBU) chuan nimin aṭang khan lungawi lohna an lantir ṭan a; Mizoram Rural Bank (MRB) pawhin zawm vein, MRB branch zawng zawng khar a ni. Lungawi loh lantirna hi vawiin leh naktukah an chhunzawm leh ang.

UFRRBU-in lungawi lohna an lantir chhan tur hi, hun rei tak aṭanga sorkara an thil phût tihhlawhtlin a nih theih nan leh an chanvo dik tak an chan theih nana sorkar nawr nan a ni a; MRB pawhin nawrhna hi an zawm ve tur thu sawiin MRB Staffs Association chuan, "Strike avanga harsatna tâwktu mimal, pawl leh sorkar department hrang hrangte chungah hriatthiamna leh ngaihdamna kan ngen a ni," an ti.

UFRRBU thil phûtte zingah - RRB provatization tumna tihtawp leh RRB tana IPO rua­hman te, Civil (Misc.) SLP 39288/12 hnuhkîr leh PENSION-PF pawhsei te, compassionate appointment scheme hman leh computer increment pawhseite a tel.

MRBSA chuan, bank dangte nen hna thawh leh recruitment thuhmun an ni chunga kawng hrang hrangah thlauhthlak bik an nia sawiin, "Hriatthiam harsa kan ti a. Kan chanvo dik tak chang turin kan nawr ve a ni," an ti a; an dinhmun chu hriatthiampui turin Mizoram mipui leh anmahni dawr ṭhintu zawng zawng an ngen a ni.