PRRS vangin vawk 8,505 a thi

AH&Vety minister C Ngunlian­chunga chuan, kum 2013 aṭanga nimin thleng khan AH&Vety department chhinchhiah danin, Mizoramah PRRS vangin vawk 8,505 a thih thu House a hrilh.

INC member T Sangkunga zawhna kal zelah C Ngunlianchunga chuan, NLUP hnuaia sem vawk note thi chu department-in pawi a tih thu sawiin, "NLUP hnuaiah vawk vulh thlang tam tak an awm a, vawk note ṭha pek a, eizawnna nghet an nei theih bakah, saa intodelh kan duh. NLUP sem hma pawhin vawk thi a awm tho a ni," a ti a; hri a lên tawh chuan inven tak tak theih a nih loh thu a sawi.

AH&Vety Minister chuan, vawk note hrisel leh ṭha zawk thar chhuah tumin sorkarin hma a lak thu sawiin, "Vawk noteah kan intodelh loh avangin hmun hla tak tak aṭangin lak a ngai a, a dahna tur hmun thlenpui chuan an ril a lo ṭám tawh a, chaw an ei ṭeuh a, an kua a ṭha lo ta ṭhin a ni. Vawk notea intodelh tur hian hmun hrang hrangah hmalak mek a ni," a ti.

C Ngunlianchunga sawi danin, NLUP hnuaiah kum 2017-18 chhungin vawk note 25,921 sem a ni tawh a, vawk note thi report an dawn chu 968 a ni. Vawk thi 4,699 râl a ni tawh a, râlna atan hian cheng nuai 30 sen tawh a ni.