Ram dang mite laka police chet danah MZP lungawi lo

MZP sub-headquarters, Tlabung chuan thuchhuah siamin, tun hnaia ram dang mi man chhuah mi parukte chunga police hmalak danah an lung­awi loh thu an tarlang.

Tlabung MZP tarlan danin, tun hnaiah Bangladesh mi ni ngeia an hriat mi paruk lakah Tlabung Police Station-ah FIR an thehlut a, police-te pawhin thil awm dan an chhui zui hnuah, mi parukte chu Tablabagh khuaah an khawsa a, Bangladesh mi dik tak vek an ni tih an finfiah a ni.

Mi parukte chu police-te'n ram dang mi an ni tih finfiah tawh mah se, an lakah thubuai an ziak lut lo tih tarlangin MZP chuan, "Hremna dang pe loa an awmna chhuahsan tura April thla chhung hun pek an ni ringawt hi kan hrethiam lo a, FIR kan thehluhin awmzia a nei lo tur hi a lungchhiatthlak hle a ni," an ti.

Tlabung MZP chuan, ram dang mi tan India rama inbenbel chu sawi loh, ramri kâna luh hrim hrim pawh dan bawh­chhiatna a tling tih sawiin, mi parukte lakah Foreigners Act, 1946 Section 14 A(b) behchhana dan anga hma la turin police-te an phut tih an tarlang a ni.