MZP nia inchhálte'n hnam dang an rîkrâp

March 25, Pathianni zan khan Kolasib district-a Saihapui (K) bul Rengte lui zaua leilet enkawltu hnam dang chhungkuate chu MZP hming inchhalte'n an rîkrâp a, hnam dangte chu an tlanchhiat hnuah an ran leh buhte an laksak.

Kolasib aṭanga thu dawn danin, thil thleng hi hriat a nih veleh Kolasib MZP hruaitute chuan Kolasib Police-ah report thehlutin a hmunah an kal nghal. Misualte hian Jerry Zoremsanga, Kolasib Diakkawn leilet thláma enkawltute chenna in suasamin, an bungrua an theh darhsak a, leilet enkawltute chu in hnung lam aṭanga tlanchhiain, an chanchin an pute an hrilh a ni. Hriat theih chinah buh bag hnih leh kel a bo.

Leilet enkawltute sawi danin, zan an mut tawh hnuah mi panga vel kalin, páwn aṭangin MZP an nih thu an sawi. Mi rîkrâptute zingah Lalremruata s/o Kaptluanga, Saihapui (K) chu a tel ngei nia hriat a nih avangin police-te'n thu zawhfiah atan nimin khan an la a ni.

Kolasib aṭanga thu dawn danin, tunlai hian hnam dang, Mizo leilet enkawltute ramri buai denchhena MZP hminga vau an awm ṭhin a; hei vanghian hnam dangte chu an khaw lamah an tlan haw nasa a, leilet neitute'n harsatna an tawh phah a ni.