Tourism hmunte khâr rih dawn

Ram hrang hranga Novel Coronavirus (Covid-19) léng vangin Tourism department chuan tourist lodge, highway restaurant, tourist resort leh Thenzawl Golf Resort-te chu March 19 aṭanga April 15, 2020 thleng khâr rih a ni dawn tih an tarlang.

Tourism department chuan, mihring tlawh chi an enkawl hmun hrang hrangte khâr rih tur chuan mikhual thlen, conference hall leh convention hall leh ei leh inte a huam tih an tarlang a, "Mipui leh khualzinte tana Tourism department-in a khârte hi a ṭul dan ang zelin pawh sei/tâwi a ni ang," an ti.

Tourism department chuan private hotel, homestay, restaurant leh thingpui dawrte chu fimkhur taka awm tura hriattirin, an mikhualte zinga rinhlelh an neih chuan sorkar hriattir vat turin a chah. Tours operator-te pawh a huhoa zin mite buaipui rih lo turin a hriat­tir bawk.