Sakawrtuichhun LC-in ram ṭheh a tum Titàwp turin ZPM ṭhalaiin sorkar phût

ZPM party ṭhalai hruaitute chuan, Mizoram sorkar chu Sakawrtuichhun Local Council-in ram ṭheh an tum tihtawp nghal turin an phût.

ZPM ṭhalai chuan, MNF kaihhruai Sakawrtuichhun LC-in an khua leh tui, in hmun la nei lo tan in hmun an ṭheh dawn thu leh in hmun la nei lote'n February 19, 2020 hmaa LC Chairman hnena inhriattir tura tihna thuchhuah an veng chhung chanchinbuah chhuah a ni tih an tarlang a, "Hemi chungchang hi ZPM ṭhalai hruaitute'n kan president Malsawmzuala hoin a hmunah kalin an chhui chiang a, LC-in ram ṭheh an tum lai hi 5th IR Battallion-in PTC ram china an ngaih lai a nih thu leh 

5th IR hotute pawhin rua­hmanna chu an duh lo hle thu kan dawng," an ti. 8th Mizoram Legislative Assembly session vawi 5-na neih zawh tâkah Land Revenue & Settlement Minister-in LC-in in hmun pek theihna thuneihna an neih loh thu chiang takin a sawi tih sawiin ZPM ṭhalai chuan, "Aizawl City Local Council Association (ACLCA)-in AMC hnuaia LC-te'n in hmun, ram pek theihna an neih loh thu thu­chhuah an lo siam tawh bawk," an ti. Chuti chunga MNF kaihhruai Sakawrtui­chhun LC-in ram ṭheh an tum chu dan kalh a nih avangin titawp nghal turin sorkar an phût a ni.