RAMRI BUAI CHINFEL NAN ; Forest Reserve area-ah dan loa thil tih A awm leh awm loh enfiah tur din dawn

Ministry of Home Affairs (MHA) hmalaknain Bairabi Zophai chhehvela Mizoram leh Assam ramrite chu nimin khan enfiah a ni a; Inner Line Forest Reserved square mile 509 chhunga dan loa thil tih a awm leh awm loh enfiah tur, Assam leh Mizoram sorkar aiawh telna Joint Committee din a ni dawn.

Bairabi Zophai hmuna MZP-te'n Zofate chawlhbuk sak an tum vanga buaina kal zelah, MHA Secretary hoa Assam leh Mizoram Chief Secretary-te New Delhi-a an inbiaknaa an thu dah angin, nimin khan MHA-a joint secretary (North East) Satyendra Garg kaihhruaiin Zophai enfiah a ni a; Satyendra Garg chuan, Joint Committee din a nih tur thu a sawi.

Satyendra Garg hi helicopter hmangin Kolasib-ah a ṭum a, chawhma dar 10:45-ah Kolasib DC conference hall-ah Assam sorkar aiawh, Mizoram sorkar aiawh, Mizoram NGO hruaitute leh Mizorama North East Student Organisation (NESO) hruaitute a kâwm. Assam sorkar aiawhte chu Home secretary LS Changsan-in a ho a, Mizoram sorkar aiawhte chu Home secretary Lalrinliana Fanai-in a ho thung.

MHA Joint Secretary chuan, "Fact Finding Committee-in sawihona aṭanga kan thil hmuh chhuahte April 5 khian Union Home Secretary hnenah kan thehlut ang a, chumi zawhah Chief Secretary emaw Chief Minister level-ah sawiho leh a ni ang. Kei chuan tih theih em em ka nei lo," a ti.

MHA Joint Secretary hnenah hian MZP president L Ramdinliana Renthlei leh Joint NGO aiawhin Central YMA president Vanlalruata ten memorandum an thehlut a ni.

MZP resolution sawi zautu NESO member C Lalremruata chuan, MZP-te'n ramri atana an pawm chu 1875 Bengal Eastern Frontier Regulations a nih thu a sawi a, "British India emaw, British Burma awpna ni loin Direct London Foreign office enkawlna hnuaiah Mizote chu enkawl ṭhin kan ni," a ti.

PMO Vision Report March 2018-a chhuakah Hailakandi mite 98% chu Bang­ladesh aṭanga pêm an ni nih thu tarlan a ni tih sawiin C Lalremruata chuan, "British hun lai aṭang tawha awmte kan ni a, dan loa India

aṭanga pêmte lakah kan ram kan chán dawn lo a, inchi khat pawh an lak aṭangin kan tawlh dawn lo," a ti a; Zophai chu Kachurtal tia thlak an remtih loh thu a sawi.

CYMA President pawhin memorandum thehlut pahin, Mizoram chu political map-a India ni ringawt lo a, India khua leh tui dik tak thinlung an put theih nan dik leh felfai taka ramri chinfelsak turin MHA Joint Secretary a ngen.

Assam Home secretary LS Changsan chuan, hmarchhak mite inngeih tláng taka awm tur an nih thu sawiin, "Mizoram leh Assam hi inṭhenawm kan ni a, kalphung hrang hrangah inanna tam tak kan nei. Ramri chu mihringte siam chawp a ni a, kan thinlung chuan ramri i pel vek ang u. Economics lam thlenga inmamawh tawn kan ni a, inngeihtlang taka awm ka duh a ni," a ti.

MHA Joint Secretary hian Zophaia Zofate Chawlhbuk sak an tumna bulah Assam leh Mizoram sorkar aiawhte meeting a neihpui leh a; hetah hian MZP aiawhte chuan, Inner Line Forest Reserve chhungah dan loa in sak tam tak a awm thu sawiin, chu'ngte chu MHA joint Secretary an kawhhmuh nghal.

MZP-te thusawi chungchangah hian Satyendra Garg chuan, Assam sorkar aiawhte chu dan an bawhchhiat thu hrilhin, phalna an neih leh neih loh a zawt a, Assam sorkar aiawhte chuan an lo inenfiah tur thu an sawi.

Satyendra Garg hian thuthar thehdarhtute a kâwm nghal a; Inner Line Forest Reserve chhungah dan loa in sak a awm leh awm loh zir chiang tur Kolasib, Hailakandi leh Cachar-a Conservator of Forest ṭheuhte telna Joint Committee din a remtih thu sawiin, "Anni hi a ṭul angin police-in an pui ang. Civil Society te pawh an tel ang," a ti a, Assam leh Mizoram sorkar ram inchuh chu Inner Line Forest Reserve chhunga dan loa thil tih a rem loh thu a sawi.

MHA Joint Secretary sawi danin, Joint Committee chu April 30, 2018 hmaa report thehlut tura tih an ni a; anni hian dan loa thil tih an hmu a nih chuan, a awm zui zel loh dan tur ngaihtuah a ni ang.

Satyendra Garg chuan, tun ṭumah chuan Inner Line Forest Reserve chungchang chauh an ngaihtuah thu sawiin, "A tahtawlin thil tih chhoh zel a ni ang. Zirlai leh journalist hliam tuarte zangnadawmna pek phût chungchang pawh MHA-in a hre tawh a, a ṭul angin an ngaihtuah dawn a ni," a ti.

Hailakandi-a chêngte 98% dan loa India rama lo lutte an nih thu Prime Minister Vision Report-a tarlan a nih chungchangah Satyendra Garg, "Assam sorkarin dan angin hma a la ang. Foreigner Act ṭha tak kan nei a, chumi hmang chuan hmalak theih a ni," a ti a; khawi hmunah pawh dan loa India rama lo lut an awm chuan state sorkarin hma a lak zel tur thu a sawi.

Zophaia state pahnih police-te an awmzui zel dawn leh dawn loh chungchangah MHA Joint Secretary chuan, vawiin (March 28)-ah a chian tur thu a sawi. Meeting chuan, hemi chungchangah hian state pahnih police hotute inbia se, an ti.

Hetih lai hian, Kolasib SP Abhisek Dhania chuan zawhna chhangin, Aizawla an hotute hnenah report a pek tawh thu leh nizan emaw vawiin lamah Mizoram police-te chu an inlak chhuah tur thu a sawi a ni.

Zophaiah hian Hailakandi DC Adil Khan chuan, journalist-te kutthlak a nih loh thu a sawi chungchangah a thu dawnna a sual leh sual loh zawhna chhangin, "Chhui chian mek a ni a, engmah ka sawi thei hrih lo," a ti.