Police battalion 8-ah post ruak 2,004 Aizawl Rural SP siam sorkarin a titawp

Nimina Assembly session-ah Home minister R Lalzirliana'n MNF member Lalruatkima zawhna chhangin, police battalion pariatah post ruak 2,004 a awm thu House a hrilh. Zawh belhna a chhannaah, DGP-in Aizawl Rural SP siamna tur a tichhuah chu dan kalh a nih avangin sût (cancel) a nih thu a sawi.

Home Minister chuan, Indian Re­served Police (IR) 4th. battalion head­quar­ters awmna tur chu Rengdil, Mamit district-ah ruahman a nih thu sawiin, "August 3, 2013 khan lungphum tawh a ni," a ti a; 3rd. IR headquarters hmun tur pawh Thingkah (Lawngtlai district)-ah siam mek a nih thu leh kuminah hawn hman beisei a nih thu a sawi.

Home Minister-in police battalion hrang hranga post ruak zat a tarlante chu - 1st. MAP-ah post 206, 2nd. MAP-ah 180, 3rd. MAP-ah 156, 1st. IR-ah 328, 2nd. IR-ah 243, 3rd. IR-ah 277, 4th. IR-ah 329 leh 5th. IR-ah 285 a ni a; a vaiin post 2,004 a ruak. Minister chuan, post ruakte chu hnawhkhat tura hmalak a nih thu a sawi a ni.

Aizawl district-ah Superintendent of Police (Rural) siam a nih chhan leh Aizawl SP nena an thuneihna chin ṭhen dan zawhna chhangin R Lalzirliana chuan, Aizawl district a lian em maia tiin department lamin DGP notification hmangin Rural SP an lo dah ve tawp mai niin a sawi a, "Hei hi an tih loh tawp tur a ni. Hetiang ang chi, post siam leh dahte hi chu sorkarin a tih tur a ni a, chuvangin, kan cancel vek tawh," a ti.

Thu dawn danin, Aizawl Rural SP post siam hi RP Meena, IPS-in Mizoram DGP mawhphurhna a chelh zawk chhunga tih a ni.