Medical college atan cheng vbc.126.72 hmu tawh ; Ruling MLA-te leh opposition MLA-te an inhnial

Health minister Lal Than­zara chuan Dr K Bei­chhua zawhna chhangin, medical college dinna atan sorkar laipui aṭangin Rs. 1,26,72,00,000 dawn a nih tawh thu House a hrilh. Nimina Assembly session-a medical college chungchanga zawhna kal zelah ruling MLA-te leh opposition MLA-te an inhnial nasa hle.

Health Minister tarlan danin, medical college, Mizoram Institute of Medical Education and Research (MIMER) dinna turin Cen­tral-in sum a rawn pek tawh cheng vbc. 126.72 aṭangin department-ah cheng vbc. 24.70 allocation hmuh a la ni lo a; Rs. 18,06,71,000 hman tawh a ni.

Dr K Beichhua zawh belh­na chhangin Lal Thanzara chuan, medical college dinna tur State referral Hospital, Falkawn chu Medical Council of India (MCI)-in an endik fo tawh thu a sawi a, "Tunah pawh inspection nei leh tura beisei reng a ni," a ti.

Lal Thanzara chuan, State Referral Hospital-ah khum 300 dah tum a nih thu te, OPD-ah ni tin mi 200 chuang, a cháng chuan mi 300 dáwnte an inentir ṭhin thu te, hmanrua dah tawhte a ṭha tawk a, world class equipment-a thuam a nih thu te, a building bikah 90% vel zawh a nih tawh thu te, teaching staff lakah, engmah a nih loh laia lo awm tawhte duhsak an nih ve thute a sawi.

State Referral Hospital chungchangah hian House leader Lal Thanhawla, chief minister chuan, a tira State Referral Hospital atana sum hmuh chu Shillong-a NEIGRIHMS nen sum hmuh zat a inan thu sawiin, "kan awm loh hlanin Falkawn damdawi-in saw tihchhiat lailet der a ni. Kum 2008-a kan awm leh hnuah nasa takin hma kan la leh a ni," a ti.

Lal Thanhawla chuan, MIMER Director tur pawh mi ṭha tak dah a nih tawh thu te, MCI-in surprise visit ṭum eng emaw zat an neih tawh thute a sawi a; "Medical college neih pawi ti lo an awm chungin medical college nei turin hma kan la zel ang," a ti bawk.

Chief Minister-in thu a sawi zawh hian eptu member ṭhenkhatte chu ding chhuakin, House Lea­der-in State referral Hos­pital leh NEIGRIHMS a khaikhin chu a dik loh thu te, NEIGRIHMS chu Referral Hospital din hma daiha din ṭan a nih thute leh thil dangte an sawi a; rorel lai member ṭhenkhatte pawh dingin, MNF sorkar laia Referral Hospital an kalpui dante an sawi ve bawk. Ruling MLA leh opposition MLA-te chu hun eng emaw chen an inhnial a ni.