MPCC-in tuiah ṭan la turin sorkar an ngen

Mizoram Pradesh Cong­ress Committee (MPCC) chuan thuchhuah siamin, ṭhál lai a nih avang leh Corona­virus laka invenna tura mipui­in kut sil nan tui an hman nasat avangin Mizoram sorkar leh PHE department chu ṭan la lehzual turin an ngen a; tui ren lehzual turin mipui an chah nghal.

MPCC chuan, khua a ṭhál a, tuihnâ a tlem tial tial a, PHE department pawhin mipui mamawh ang tui min pe hleithei tawh lo tih sawiin, "Tui mamawhna nasa taka a pun lai hian Aizawl veng ṭhenkhatah chuan chawlhkar tin tui min pe thei tawh lo a, a haw chhunah pawh a haw tlem thei hle," an ti a; khawpui dang leh thingtlang lamah pawh tui harsatna a nasa sâwt hle tih an sawi.

Congress party tarlan dan­in, Covid-19 laka invèn nan mi tam tak inah an awm tam a, kut sil uluk a ngaih avangin chhungkaw tinin a hma zawng aiin tui an hmang nasa a ni. Uluk taka kut sil nan tui litre khat vel a ngai a, ni khatah kut vawi 10 sil turin mi pakhatin litre 10 an mamawh belh tihna a ni. MPCC chuan, ṭhál laia tui mamawh a pun avang hian tui ren lehzual turin mipui an ngen a, "Mipui harsatna hria a, hnianghnar zawka tui kan hmuh theih nana ṭan la lehzual turin Mizoram sorkar leh PHE department kan ngen a ni," an ti.

Covid-19 laka invenna atana kohhran leh pawl hrang hrang hmalakna chu lawm­awm an tih thu an sawi a, "Mizoram sorkar pawhin nawrna na tak a dawnte ngai pawimawha chak lehzuala Covid-19 do tura hma a la chho hi a lawmawm kan ti hle a ni," tiin an tarlang.