Mizoramin Housing for All (Urban)-ah Cheng nuai 236.97 a hmuh belh dawn

UDPA minister Zodintluanga chuan, in sakna nei lote'n in an sak ve theih nan Mizorama chhungkaw 15,798 tan sorkar laipuiin PMAY-Housing for All (Urban) hnuaiah cheng nuai 236.97 a rawn pek dawn thu Assembly House a hrilh.

Session-a zawhna leh chhanna hun a zawh veleh minister Zodintluanga chu ding chhuakin, sorkar laipui aṭangin mi rethei in sakna tur sum hmuh belh a nih tur thu hi a sawi a, "Hei hi Beneficiary-Led Construction (BLC) component hnuaia mi a ni a, chhungkaw pakhatin Rs. 1,50,000 ṭheuh an dawng dawn a, Mizoramin urban area 23 a neih khua zawng zawng a huam vek dawn a ni," a ti.

UDPA Minister sawi danin, sorkar laipuiin khawpuia in nei lote tana in sak sakna tur Pradhan Mantri Awas Yojana - Housing for All (Urban) a kalpui mek tawh a; Aizawl leh Mizorama census towns 22 atan UDPA-in housing demand survey neiin, dilna hun a hawng a, a hmu thei chin chu kum khata Rs. 3,00,000 la lut pha lote an ni.

Urban area-a demand assessment neih hnuah UDPA department chuan dilna 39,696 a dawng tawh a, chuta ṭang chuan mi 29,354 chu dil thei (eligible) ngei an ni tih a finfiah niin, chumi hmanga DPR siam chu sorkar laipuiah thehlut a ni. Demand survey chu state dang aiin Mizoramin a tih zawh hma avangin Ministtry of Housing & Urban Affairs chuan sum pek hmasak zingah Mizoram a telh a; hmalakna hmasa atan Aizawl leh Lawngtlai thlangin, Aizawlah beneficiary 846 leh Lawngtlaiah beneficiary 500 tan sum hmuh a ni tawh.

Tuna sum hmuh belhna atana DPR siam chu UDPA department hotute'n MoHUA hnuaia Central Sanctioning & Monitoring Committee (CSMC) hmaah March 26, 2018 khan an sawifiah a; CSMC chuan DPR approval an lo pe ta a ni.

Zodintluanga chuan, cheng nuai 236.97 hmuh tur chu March 2018 tàwpah hmuh hman a nih loh pawhin April 2018-ah chuan hmuh ngei beisei a nih thu a sawi.