Mizoram Sports Policy bawhzui rih lo

Sports & Youth Services (SYS) minister Zodintluanga chuan MNF member Lalruatkima zawhna chhangin, Mizoram sorkarin Draft Sports Policy a nei tawh tih a sawi a; chutih rual­in, sorkar laipuia Ministry of Youth Affiars & Sports-in National Sports Policy a ruahman avangin kalpui zui a nih rih loh thu House a hrilh.

SYS Minister chuan, Mizoram state-in Sports Policy neih tumin hma a la tih sawiin, July 3, 2009-a Committee on Draft Mizoram State Sports Policy meeting-in Draft Sports Policy chu a pawm tawh thu a sawi a, "Hemi hnu hian Ministry of Youth Affiars & Sports-in National Sports Policy nei tura ruahmkanna a siam tak avangin sorkarah pawmpuina dil a ni lo," a ti.

Zodintluanga chuan, National Sports Policy a awm laia state bilin sports policy lo neih bik chu a ṭha ber ang em, tih ngaihtuahna a awm thu sawiin, "National Sports Policy hi a ṭha turah kan ngai a, kan nghak rih a ni," a ti. Infiamna lama ti ṭhate hnena pek ṭhin incentive cash award chungchangah, sorkar kum thar 2018-19 atana budget-a sum dah chu token mai a nih thu sawiin, "Medal lak zat tur hriat lawk a ni lo a, sum pek tur zat pawh hriat a ni lo a, a daih loh chuan Finance-ah kan dil belh mai ṭhin a ni," a ti bawk.