Health deptt. officer lakah MLA a lawm lo

Nimina Assembly budget session-ah Tuivawl bialtu MLA RL Pianmawia chuan, Ratu damdawi-ina doctor dah tur chungchangah Health department-a officer pakhat­in a dang tlat nia sawiin, a lawm loh thu a sawi. Hemi chungchangah hian Health minister Lal Thanzara chuan, mi pakhatin a dan tlat theih a nih loh thu sawiin, Ratu damdawi-in dinhmun chu an lo en chian tur thu a sawi.

INC member RL Pianmawia hian ratu damdawi-inah NHM aṭangin doctor dah a ni a, mahse, rei lo te hnuah hmun dangah a awm avangin Ratu-ah doctor a la awm leh loh thu a sawi a, "Kan Minister lakah ni lo hian lawm lohna ka nei a. Department officer pakhatin min dang tlat mai a. AYUSH doctor tal min dahsak thei ang em?" tiin Minister a zawt a ni.

Health Minister chuan, "Mi pakhatin a dan tlat theih a ni lo. ratu PHC dinhmun hi kan lo en chiang ang," a ti a; NHM hnuaiah doctor lak ni ṭhin mah se, hna ṭha zawk an hmuh avangin an chhuak leh ṭhin a, doctor indaih lohna a awm phah ṭhin thu a sawi.

Zawhna chhangin Lal Thanzara chuan, Darlawn damdawi-in (PHC) building sak ṭhat tum mek a ni a, NABARD hnuaiah proposal thehluh a nih thu House a hrilh a; motor indaih lohna vangin Darlawna medical officer hman tur motor pek mai tur a awm loh thu sawiin, "Remchang a awm veleh pek tum a ni. Motor eng emaw zat lei thar tum a ni a, a mamawhtute'n an dawn ngei theih nan hma kan la ang," a ti.

Health Minister chuan, Health department-a thawktu doctor, health worker leh group-D indah lohna chu sorkar sum indaih lohna vangin tun dinhmunah chuan sutkian hleih theih a nih rih loh thu a sawi rualin, sorkar laipuiin approval a pek ang zelin NHM hnuaiah doctor lak mek zel a nih thu a sawi. Health worker indaih lohna sutkian tum mek a nih thu sawiin, "Health worker inawm thuam an awm chuan kan siam rem ang," a ti a; chutih rualin, a huam chin zauh zawng azirin hmun pakhatah health worker pakhat aia tam awm a ṭul theih thu a sawi.

13th. Finance Commission hnuaia Bolero motor 21 lei tum chungchang Lalruatkima zawhna chhangin Lal Thanzara chuan, motor man tur sum pek a ni tawh mah se, a supply tura tihte'n tun thlenga an la pek theih loh thu a sawi a, ""Court-a kal hial ngaihtuahnaah a awm a. Motor min pe lo a nih pawhin, pawisa tal lak let kan tum," a ti.