Lianchhiari Rûn lungphùm phúm

Information & Public Relations (IPR) department-in an directorate building bula Lianchhiari Rûn, Multi Facility Centre an sak tur lungphùm chu nimin khan IPR minister Lal Thanzara’n a phúm.

Minister Lal Thanzara chuan, Lianchhiari Run, Multi Facility Centre changtlung tak sak a ni tur chu Mizoram tan thil ropui tak a nih thu sawiin, sorkar leh mipui tana chhawr nahawm, ṭhalaite leh zirlaite'n finna leh hriatna an chharna hmun a nih a beisei thu a sawi a, "Lianchhiari Rûn hi sak zawh a nih hunah chuan Mizo ṭhalai talent nei ṭha tak takte kutchhuak phochhuahna hmun ṭha kan nei tawh dawn a ni," a ti.

Lianchhiari Rûn hi North Eastern Council (NEC) sum hmanga sak tur niin, cheng vbc. 10 ruahman a ni a; a chhungah mi 95 ṭhut theihna lecture hall, mi 200 ṭhut theihna conference hall, exhibition hall, art gallery, mini theatre leh lirthei eng emaw zat dah theihna parking-te siam tum a ni.