Zángnadawmna siamṭha turin Court-in sorkar a hriattir
Serkhan-Bagha Road siam meka zangnadawmna pek zat tur ruahman tawh chu Gauhati High Court, Aizawl Bench-in ennawna siamṭha turin Mizoram sorkar a hriattir.
Thu dawn danin, North Eastern Council (NEC) aṭanga sum hmuh hmanga Mizoram PWD-in Serkhan-Bagha road a siam mekah hian, mimal ram lâkah Kolasib District Collector (district bawrhsap)-in kum 2014-ah zangnadawmna pek zat tur a ruahman. Chutah chuan thil dik lo tam tak a awm nia hriain Serkhan-Bagha Road Coordination Committee chuan a thara en ṭhat leh a nih theih nan Gauhati High Court-ah PIL an thehlut a ni.
Serkhan-Bagha Road Coordination Committee ngenna chungchangah hian Gauhati High Court Aizawl Bench chuan March 19, 2018 khan thutlukna a siam a; zangnadawmna pek zat tura ruahman tawh chu ennawn a, siamṭha turin Mizoram sorkar a hriattir a ni.
Vanglaini palaiin a chhui chiannaa PWD hotute hnen aṭanga thu dawn danin, Serkhan-Bagha road zauh tirhah PWD-in a hranin verification an nei a, zangnadawmna atan cheng nuai 500 chuang an ruahman chhin a ni. A hnuah Land Aquisition dan pangngai hmangin Kolasin DC-in zangnadawmna atan nuai 700 chuang a ruahman leh a; a hnuah PWD ruahman nena belhkhawmin, cheng vbc. 12 chuang a tling. Cheng vbc. 12 chuang aṭanga solatium 30% leh interest 12% belh hnuah vbc. 20.51 a tling leh bawk.
Kolasib DC-in zangnadawmna pek tura award a siam chu Land Revenue & Settlement department-in a pawm a, mahse, Finance department lamin a tam lutuk an tih avangin sum an pe chhuak (sanction) thei lo a, zangnadawmna pawh pek lohin a awm ta reng a ni.
Zangnadawmna pek loh vanga in ṭhiah theih loh leh kawng a nih dan tur anga sial theih loh a awm nual a, survey laia kawng hêlna(diversion) awm tura ruahman, compensation ruahman vek tawh laih leh loh a awm nual avangin dik lo a awma hriat a ni a; Kolasib DC-in a ruahmanna leh PWD ruahmanna a belhkhawm avangin thil dik lo tam tak, a dik loa zangnadawmna a awma hriat a ni bawk.
Sekhan-Bagha road-in a paltlang tur ram neitute chuan Pahlira, Lungmuat kaihhruaiin Serkhan-Bagha Road Coordination Committee an din a, kawng chu siam a nih thuai theih nan leh zangnadawmna pek tura tiha dik lo awmte siamṭha a, a hmu tur dik takin an hmuh theih nan hma la turin sorkar an nawr.
Serkhan-Bagha Road Coordination Committee chuan ukil C Lalramzauva ruaiin High Court-ah PIL an thehlut a; High Court chuan thutlukna siamin, Mizoram sorkar chu kawngpuiin a paltlang turah ram leh thil dang a tihchhiat ngeite enfiah a, a neitu dik takte hnenah a rang thei anga zangnadawmna pe turin a hriattir ta a ni.