Sorkar hmalaknaah NTUM an lâwm

National Trade Union of Mizoram (NTUM) chuan, Mizoram sorkara muster roll (MR)-te dinhmun zir chiang a, an awm dan tur duangtu tura sorkarin a din Study Team report sorkarin a ennawnsak dawn avangin an lawm thu an tarlang a; private firm hrang hrangte chu Labour Law angin an hnuaia thawkte chhawr tura an duh thu an sawi.

NTUM hruaitute hian nimin khan Aizawl Press Club-ah thuthar thehdarhtute an kâwm a; an president C Remtluanga'n chuan, MR chawikânna tura ruahmanna sorkarin a ennawnsak leh dawn avanga an lawm thu sawiin, "Vawiin hian Chief Minister leh Deputy Chief Minister hnenah kan duh dan leh beiseite Cabinet meeting-a an sawi tel theih turin ziakin kan thlen dawn a ni," a ti a; an beisei anga hamṭhatna an hmu lo a nih chuan sorkar nawr zel tura an inpeih thu a sawi.

C Remtluanga chuan Mizoram chu Labour Law palzût nasa ber state a nih an rin thu sawiin, "Private firm neitute'n Labour Law-in ti tura a tihte dan anga an kalpui theih nan NTUM chuan hma a la mek zel. Employees' Provident Fund (EPF) leh Employees' State Insurance (ESI) phei chu tih ngei ngei tur a ni," a ti.