2018-19 chhungin 7th. Pay pek tum a ni ; A hun hmain Assembly session Q&A a darh

Finance minister Lalsawta chuan, Mizoram sorkar hnathawkte chu kum 2018-19 chhungin 7th. Pay Commission rawtna zûlzuiin hlawh pek tum a nih thu Assembly House a hrilh. Nimina Assembly session zawhna leh chhanna hi a hma zan, March 27 zanah social media-ah a darh a; Assembly Secretariat-in police-ah FIR thehluh an tum nia thu dawn a ni.

Nimina Assembly session-ah MNF member pathum - K Sangṭhuama, Dr K Beichhua leh Lalruatkima te, MPC member Lalthanliana leh INC member TT Zothansanga te zawhna inṭâwm chhânga Finance Minister tarlan danin, Mizoram sorkar hnathawkte'n 7th. Pay anga hlawh an lak theih dan tur zir chiangtu tur Committee November 13, 2017-ah din a ni.

Committee chairman chu Planning Board vice chairman H Liansailova niin, Taxation secretary Vanlal Chhuanga chu member-secretary a ni a; Agriculture minister KS Thanga leh Finance secretary hlui Lalthansanga te member an ni. Anni hian sorkarah report an la thehlut lo.

Lalsawta chuan, 7th. Pay Commission rawtna anga Mizoram sorkar hnathawkte hlawh pek an nih chuan, sorkarin thla khatah Rs. 46,93,74,096 leh kum khatah Rs. 5,63,24,89,152 a sên belh dawn tih a sawi.

Finance Minister chuan, Mizoram sorkar hnathawkte kum 2018-19 chhungin 7th. Pay anga hlawh pek tum a nih thu sawiin, "A zir chiangtu Committee-in an zir mek a, thla ruk chhungin report an thehlut ang a, chuta ṭang chuan Cabinet-in thutlukna a siam dawn. Thla ruk a ral hma pawhin report hi an thehluh rin a ni," a ti.

INC member TT Zothansanga'n Mizorama Pay Commission thar anga sorkarin hlawh a pek kum leh tute party sorkar laia pek ṭan nge tih a zawh belhna chhangin Lalsawta chuan, 5th. Pay chu MNF sorkar lai, kum 1999-a pek ṭan a nih thu leh 6th. Pay chu Congress party sorkar lai kum 2009-a pek ṭan a nih thu a sawi.

MNF member Lalruatkima chuan, 7th. Pay chungchang zawhna leh chhanna chu March 27, Thawhlehni zan dar 10:20-ah mi pakhatin Whatsapp group-ah a post nia sawiin, "A serious hlein ka hria a, Assembly House zahawmna tihbawrhbânna a ni," a ti a; pawi a tih thu a sawi a ni.

Assembly session zawhna leh chhanna a hun hmaa a darh chungchangah hian Finance minister chuan, pawi a tih thu sawiin, "A vawi khat thlenna a ni hial mai thei a. Minister an ni emaw, Assembly Secretariat lam an ni emaw, a mawhphurhtu hriat a ngaiin ka hria. Assembly secretariat a ni a, chhui chhuah ngei ni se, a mawhphurtu chu dan anga hrem a ṭhain ka hria," a ti.

Vanglaini palai zawhna chhangin Lalsawta chuan, zawhna leh chhanna leak out chu thil pawi tak a nih rualin, la lang leh tur tho a nih thu leh, ram leh hnamin a tawrh phahna tur a awm loh thu a sawi.

Lalruatkima chuan Vanglaini palai zawhna chhangin, "Assembly question hi MLA-te chuan a hma zanah a zawhna chiah kan dawng ṭhin a, minister-te chuan a chhanna nen an dawng thung. Hetianga a leak out-te chuan zawhna leh chhanna hun hman a ṭulna a awm dawn lo asin," a ti.

Assembly Secretariat hotute chuan, he thil thleng chungchangah hian a titu chhui chhuak turin police-ah FIR thehluh an rilrûk thu Vanglaini an hrilh a; he thu ziah lai hian hmalak dan tur an rêl mek a ni.