Khuarel chhiatna vangin mi 19 thi

Disaster Manage-ment & Rehabi­litation (DMR) minister C Ngun­lian­chunga chuan, MNF mem­ber Dr K Beichhua zawh­na chhangin, kum 2017-18 chhungin Mi­zoramah khuarel chhiat­na (natural disaster/calamity) vangin mi 19 an thih thu Assembly House a hrilh.

Minister C Ngunlian­chunga'n Assembly House a hrilh danin, kum 2017-18 chhunga Mizorama khuarel chhiatna vanga district hrang hranga mitthi zat chu - Aizawl district-ah mi panga, Lunglei district-ah mi pakua, Siaha leh Lawngtlai district-ah mi pahnih ve ve leh, Champhai district-ah mi pakhat a ni.

Zawh belhna chhangin C Ngunlian­chunga chuan, khuarel chhiatna thleng vanga thite chu sorkar dan angin Rs. 4,00,000 zelin sorkarin a ràl thu a sawi a; ex-gratia hi mi 17 hnenah pek tawh niin, mi pahnih hnenah pek a la ni lo tih a sawi.

DMR Minister chuan, kum 2017-18 chhunga khuarel chhiatna tuarte chhawmdawlna atan sorkar laipuiin cheng vbc. 35 a rawn pek dawn thu a sawi a; sum hmuh a nih hunah in leh lo chhia te, bul leh bâl leh thlai chhia neitute hnenah chhawmdawlna pek vek a nih tur thu a sawi bawk.