Transport deptt.-in MST bus 49 a nei ; Kum 3 chhunga MST bus-te sum hmuh nuai 6.03

Transport minister John Rotluangliana chuan, Mizoram State Transport (MST) bus 49 a awm thu House a hrilh. Minister Rotluangliana sawi danin, MST bus-te'n kum thum chhunga sum an hmuh belhkhawm chu cheng nuai 6.03 a ni.

Transport Minister-in MST bus-te'n sum an hmuh zat a tarlan danin, kum 2014-15 chhungin cheng nuai 2.31, kum 2015-16 chhungin nuai 1.85 leh kum 2016-17 chhungin nuai 1.87 an hmu. Chutih laiin, kum 2014-15 chhungin cheng nuai 22.54, kum 2015-16 chhungin nuai 24.89 leh kum 2016-17 chhungin nuai 24.27 hloh a ni.

John Rotluangliana chuan, MST bus-te chu hlêp neia tlân tura beisei an nih loh thu leh a chuan man pawh a tlâwm bik thu a sawi a, "Mipui tana service tura ruahman a ni," a ti.

Transport Minister-in MST bus-te'n kum khata sum an hmuh zat a tarlan hi MNF member Lalrinawma chuan a tlem leh lutuka a hriat thu sawiin, tihsual emaw, thil dik lo emaw a awm leh awm loh a zawht a; Transport Minister chuan, MST bus-te'n hlêp an neih loh thu leh cheng tam tak an hloh zawk thu a sawi a ni.

MST bus-te'n kum khata sum an thawh chhuah zat hi bus awm zat aṭanga chhûtin, MST bus pakhatin kum 2014-15 chhungin Rs. 4,714.28 a thawk chhuak ang a ni a; MST bus pakhatin kum 2015-16 chhungin Rs. 3,775.51 leh kum 2016-17 chhungin Rs. 3,816.33 a thawk chhuak ang a ni bawk.