Hri danna beihpui thlak tur zirho

Health & Family Wel­fare department chuan, nimin khan an conference hall-ah MJA member-te Measles leh Rubella Vaccination Campaign kalpui tur an hrilhfiah.

Inkhawm hi state immunization officer Dr Lalzawmi'n a kaihruai a; WHO-a SMO Dr Lalhimpuii'n measles (sentût) vei tam ber chu naupang an nih thu sawiin, "An khua a sik a, ni li hnu velah an taksaah a bawl chhuak ṭhin a, ni 21 hnu velah a reh ṭhin. Khawi hmunah pawh a léng thei a, a hlauhawmna chu chil, mit êk leh hnaptui aṭangtein a kai theih. Enkawl ṭhat loh chuan mit a tidel thei a ni," a ti.

Dr Lalhlimpuii chuan, khawelah sentût vei mi 1,30,000 vel an awm thu sawiin, "India ramah mi 49,000 an awm," a ti a; sentût veite chu enkawl ṭhat an nih loh chuan 10% vel thlengin thihna chance a awm thu a sawi.

Rubella chu sentût aia nêp zawk deuh a nih thu sawiin Dr Lalhlimpuii chuan, "Nuin nau a pai laia an vei chuan naute thihna hial a thlen thei. An dam a nih pawhin an piangsual ṭhin. Kum tin mi nuai khat velin rubella an vei a, chung zinga 40,000 chu India ram mi an ni," a ti.

Dr Lalhlimpuii sawi danin, Measles leh Rubella Vaccination Campaign hi India ram pumah kalpui a ni dawn a, state 15-ah kalpui a ni tawh. Naupang thla 9 leh tleirawl kum 15 inkarte a venna damdawi hmanga chiu tur niin, India ramah naupang/tleirawl nuai 4045 chiu tum a ni a, Mizoram bikah chuan naupang/tleirawl nuai 3.84 chiu tura ruahman a ni.

Campaign hi Mi­zoramah chuan April 16, 2018-ah ṭan a ni dawn a, chawlhkar hnih chhung chu sikulah campaign tur a ni a, chawlhkar hnih dang chu khua/veng chhungah kalpui tur niin, a kar tawpnaah naupang la chiu lohte zawngin chiu an ni ang.