Larsap-in Mizo mipui Good Friday & Easter chibai a buk

Governor Lt.Gen. Nirbhay Sharma chuan nimin khan Good Friday leh Easter Sunday thuchah a tichhuak a; Mizo mipuite chibai bûkin, "Mizo mipui zawng zawng Good Friday leh Easter hun hlim leh lawm taka hmang turin ka nupui nen duhsakna kan hlan a che u," a ti.

Governor chuan, Good Friday-in mihringte tana Isua inpumpekna ropuizia a hriattir thu tarlangin, "Isua khenbeh a nih hnua thawh lehna nía a tho leh hian sualna chu ṭhatnain a hneh tih a lantir a ni. Isua khan tharum thawhna te, sakhaw âtchilhna te, phuba laknate aiah hmangaihna te, ngaihdamna thu te, thutakte a hril ṭhin," a ti a; serh leh sâng ngaih pawimawh aiin thlarau lam thilte a ngai pawimawh a, Amah zuitu Mizote chu ṭhatna kawng zawh turin a fuih.

Larsap chuan, Good Friday leh Easter-ah hian chi leh hnam hrang te, ṭawng hrang hman vanga kan inpumkhat theih lohnate hneh a, state rálmuang leh inngeih tlanga awm tura ṭang tláng turin Mizo mipui a sáwm a, "Isua Krista'n entawn tur min hnutchhiah anga nung thei turin mahni inbih chiangin i inpe thar leh ang u," a ti.