Tlawng leh Pukpui inkara rigid pavement Siamna atan cheng nuai 300 ruahman
PWD minister Lal Thanzara chuan, Aizawl-Lunglei World Bank Road-a Tlawng leh Pukpui inkar PCC/rigid pavement siamna atan cheng nuai 300 ruahman a nih thu leh, contractor hmante chu C Lalhmingliana, Lunglei Chanmari leh Tantia Constructions-te an nih thu Assembly House a hrilh.
MNF member Lalruatkima zawhna chhangin Lal Thanzara chuan, World Bank Road-a Tlawng leh Pukpui inkar PCC/rigid pavement siam hna chu November 27, 2017-ah thawh ṭan a nih thu leh, hna thawk hmasatu chu C Lalhmingliana, Lunglei Chanmari a ni a, metre 306-a thui a thawh hman thu a sawi.
PWD Minister chuan, "Hna thawh tur (rigid pavement) sei zawng hi km. 1.128 a ni a, a hna hi a hmanhmawhthlak em avangin contractor-te open tender ko loa pek an ni," a ti a; hna thawh zawh hun tur chu April 20, 2018 a nih thu leh contractor-te hnenah sum pek a la nih loh thu a sawi bawk.
Lal Thanzara chuan, Tlawng-Pukpui inkar kawng siamah a chhe lai a awm chu pawi a tih thu sawiin, "Nasa taka tihmualpho theiha engineer-te an awm hi a pawi kan ti a. Kawng ṭha kan neih theih nahn ṭan kan la a, hna thawk ṭha lote chungah action lak a ni," a ti a; kawng siam enkawltu PWD EE, SDO leh JE-te chu Lunglei mipuiin an duh loh avangin sawn an lo nih tawh thu a sawi.