Assam-in Mizo khualzinte lirthei an dap ṭhinah Zodintluanga'n hma la vat turin sorkar a ngen ; Assam nen kan boruak a ṭha chho zel - CM

Nimin Assembly Session-ah Congress Legislature Party (CLP) leader Zodintluanga chuan Assam Police-te'n ruihhlo chhuan­lamin Mizo khualzinte lirthei an dap ṭhin thu sawiin, "Hei hi Fundamental Right bawhchhiatna dik tak a ni," a ti. Hemi chungchangah hian chief minister Zoramthanga chuan Assam nen kan boruak a ṭhat chhoh zel thu a sawi.

Zodintluanga hian special mention-ah Assam-in ruihhlo chhuanlama Mizo khualzinte lirthei an dap ṭhin thu hi sawiin, "August 17, 2021 khan Bilkhawthlira bus neitu F Lalrotluanga chu a bus-ah Assam Police-te'n heroin an man nia sawiin, Silchar Jail-ah a tang mek a ni. Amah hi drugs nena inhnamhnawih ngai lo niin amah hrechiangtute'n sawi mah se, a motor-ah a hmuh loh laia drugs dah ruin, man a ni," a ti.

CLP Leader chuan July 29, 2021-ah Assam sorkarin Mizoram aṭanga lirthei lutte ruihhlo tawlh ruk venna tur chhuanlamin endik zel tur an tih thu sawiin, "Mizoram aṭanga lirthei lut reng reng tidingin, an lo endik ta ṭhin a ni," a ti a, state tinin rinhlelhawm lirthei endik theihna nei mah ila, khualzin pawisawi lote zahawmna leh zalenna tiderthawng zawnga chet chu ngaihthutak hle tur nia a hriat thu a sawi.

India ram khawi inter-state border-ah nge ruihhlo phurhruk chhuanlama state dang aṭanga lirthei lut tur zawng zawng an dap ṭhin le? tia zawhna siamin Zodintluanga chuan, "Assam sorkar thiltih dan hi chhuanlam dawrawm tak siam a, tum reng vanga India khua leh tuite laka hleilenna dik tak a nih bakah kan Fundamental Right bawhchhiatna dik tak a ni," a ti.

Zodintluanga chuan Assam thil tih dan chu high court-ah emaw, a ṭul a nih chuan Supreme Court thleng zualkona tur nia a hriat thu sawiin, "Keini, he House chhunga awm legislator-te hi chuan kan tuar lo a nimaithei. Mah se, kan khua leh tuite hian an tuar mek. Tute pawh hi F Lalrotluanga anga vanduai palh ve thei vek an ni," a ti a, thil pawizawk dang a thlen hma-a hma la turin Mizoram sorkar a ngen.

Assembly Speaker-in a sawm angin chief minister Zoramthanga chu Zodintluanga thusawi zawh hnuah dingin, "Inkah hnu July 29, 2021 khan Assam chuan travel advisory siamin, an mi leh sate chu Mizorama zin lo tur leh, Mizorama awm mekte pawh fimkhur tura an tih bakah, Mizoram aṭanga lirthei lutte ruihtheihthil an phur em tih uluk taka enfiah tura tihna order an siam a ni," a ti.

Chief Minister chuan Assam thil tihdan chu July 30, 2021-ah Ministry of Homa Affairs hnenah an thlen thu sawiin, "August 5 khan travel advisory chu an ṭhiat a ni. Lirthei vei vak zawng zawng pawh an endik tawh loa, a tam tham avangin endik vek sen pawh a ni lo," a ti a, lirthei veivakte endik vek tawh lo mah se, endik tura tihna order erawh sut a la nih loh avangin hmalak zui a ṭul thu a sawi.

CM Zorama chuan inkah hnuah Assam lamin an thinrim an tihnat thu sawiin, "Tunah chuan boruak a ṭha chho zel. Kan ram chinah huaisen takin hma kan la zel ang. Assam lam pawhin inkap zawnga na taka nawr chu an tih duh bik kan ring tawh lo. Huaisen tak leh dik taka kalzel kan tum. Dan bawhchhe hmasak zawka ṭang loin, an bawhchhiat chuan a ṭul ang zela hmalak kan tum," a ti.