Assam-in Mizo chhungkaw 20 ram an luah

INC member Lalrindika Ralte zawhna chhangin Home minister Lalchamliana chuan, kum 2019-2021 chhungin Kolasib district-ah Assam lamin chhungkaw 20 te ram an rawn luah thu House a hrilh.

Home Minister tarlan danin, Thinghlun, Mamit district-ah chuan Assam lamin kan ram anga kan ngaih an rawn luah hriat a ni lo. Buarchep, Aitlang leh Phainuam, Kolasib district-ah chuan Assam lamin chhungkaw 20-te ram an rawn luah a ni.

Aitlang bikah Mizo chhung­kaw 10-in an ram an chan a, tun dinhmunah chuan chhawm­dawlna pek chungchang sor­karin a la ngaihtuah loh bakah, ram tichhetu Assam sorkar hnenah Mizoram sorkarin zangna­dawmna a la phut lo.

Lalrindika Ralte-in Phainuam (Buarchep) lamah Assam Police-te'n feh an phal lohna hmuna Mizote'n huan atana an neihte Mizoram chhung a nih leh nih loh a zawhna chhangin Lalchamliana chuan, "Heng ramte hi notification 1933 pawn lam a ni a, 1875 notifi­cation behchhan erawh chuan Mizoram chhung a ni," a ti.