Phai aṭanga thlai lakluh a tlahniam ; Mipuite thlaiah an buai phah lo

Commerce & industries (C&I)depart­ment-in a chhinchhiah danin, Covid-19 len hma kum 2019-a phai aṭanga thlai an lakluh aiin kum liamta 2020-a an lakluh chu a tlem hle a, quintal 26,618-in a inthlau. Mizoramah thlai thar a tam avangin mipui an buai chuang lo.

Hetihlai hian, sorkar chuan thlai thartu leh phai aṭanga laluttute tan dan ṭha zâwk nei turin hma an la mek.

Vanglaini palaiin a kawmnaah Commerce & Industries dept. hotute chuan, kum 2019 chhung khan phai aṭangin thlai quintal 54,807 lakluh a nih thu sawiin, "Kum 2020 chhung khan, hri vangin phai aṭangin thlai hi quintal 28,189 chiah lakluh theih a ni. Hei hi checkgate kan neihna Vairengte, Kanhmun leh Bairabi aṭanga lut chhinchhiah a ni. Kum 2021-ah June thleng khan thlai kg. 19,759 lakluh a ni tawh," an ti.

C&I depart­ment hotute chuan Mizorama thlai thar a tam lai chuan The Mizoram Agriculture Produce (Prohibition Movement) Order 1999 hmangin phai aṭanga thlai lalut ṭhin supplier-te hnenah phalna an pe lo ṭhin tih sawiin, "Hei hi order mai a nih avangin thlai lakluh dan theihna dan erawh a awm lo," an ti a, Mizo­ram sorkar chuan dân ṭha zâwk nei turin a buaipui mek niin an sawi.

Thlai lalkluh tlem avangin mipui an buaiphah chuang lo nia sawiin C&I dept. hotute chuan, "Thlai tam zual phei chu a hralhna thlengin an buai phah zâwk châng a awm hial. Mizorama thlai thar a tam lai chuan a zuar chhawngte pawhin Mizoram thlai zuar turin theihtawp an chhuah ve ṭhin zâwk a ni," an ti.

Mizoramin thlai a lâkluhnate chu Assam, Meghalaya leh Maharashtra a ni ber a; C&I dept. hotute sawi danin, checkgate an neih lohna Phaisen kawng aṭangin thlai rawn phur ru pawh an awm ve ṭhin.

Samthang leh a chhehvel leh Ṭawi aṭanga Zikhlum chinte chu tunlai hian a tam hle a, a hralhna pawh buaipui tham a awm avangin Vegetable Supply Chain kaltlangin tihral dan an zawnpui ṭhin a, mipuiin an lei bâkah jail leh home hrang hrangahte an hralh kual ṭhin.

C&I dept. hian Samthang zikhlum bik hi kum 2017 khan a hmunah kal chilhin an lo zir chiang tawh a, August 15, 2017 aṭangin a man an siam ṭhatpui a ni.

Kharchhawng chungchanga zawhna chhangin C&I dept. hotute chuan, "Mizoram Vegetable & Fruits Supplier leh Vegetable Supplier-te an awm a, phai ram aṭang supplier hi mi 20 vel an awm thung. Aizawl Bazar pui behchhan an ni tlangpui a ni. Mizorama thlai thar a tam lai chuan an ṭangkai hle. Zing dar 5-ahte kaithoin thingtlang thlai hralh dante kan buaipui ho ṭhin," an ti.