AMC hotute'n plastic sawngbawlna tur an tlawh

Aizawl Municipal Corporation (AMC) mayor Lalrinengsa Sailo hoin nimin khan councillor-te'n AMC ram, Luangmuala Plastic Waste Management Centre dinna tur hmunhma an tlawh.

Lalrinenga Sailo chuan AMC leh Mizoram sorkarin Aizawl khawpuia bawlhhlawh aṭangin plastic waste lahrang turin an rel tawh tih sawiin, "Luangmuala AMC ramah hian plastic hi process tum a ni. Kan process-naah hian a silfaina te, a herdipnate leh a recycle-na thlengin sorkar nena ṭang hoin ruahman a ni," a ti.

Aizawl khawpui bawlh­­­hlawhte chu Tui­rial lamah a vaia bun khawm tawh loin plastic bik chu Luangmualah hian sawngbawl an tum thu sawiin AMC Mayor chuan, "Plastic-te hi herdipin bitument nen kan chawhpawlh dawn a ni," a ti a, plastic road siam an tum thu a sawi.

AMC Mayor chuan Aizawl khawpui leh lui kawr dung tihnawktu, tuna Aizawl khawpuia plastic chhia tam tak hi state pawna hralh tawh loin revenue ṭha taka chantir AMC chuan a tum thu sawiin, "Aizawl chhim lam tan tunah hian Hualngohmunah waste centre atan cheng vbc 16.64 senna tur sorkarin min ruahmansak mek," a ti.