KHAWTHLIR

Thisen pe
Isua Krista Kohhran golden jubilee lawm nan nimin khan IKK Ṭhalai Central Committee huaihawtin IKK ṭhalaite'n Aizawl Civil Hospital blood bank-ah thisen unit 61 an pe. Mahnia a thlawna thisen pe mi pariat an awm bawk. Nimin vêk khan ṬKP, Kolasib Bialte'n Kolasib District Hospital-ah thisen unit kua an pe a, petute mipa pariat leh hmeichhia pakhat an ni.

Lawmpuina hlan
Home minister Lalchamliana, Hrangturzo bialtu MLA chuan nimin khan a bial chhunga HSLC leh HSSLC Examination, 2021-a zirlai leh zirna-in tiṭhate hnenah khawtlang hruaitute kaltlangin lawmpuina a hlan. Lalchamliana hian HSLC exam-a zirlai pass vekna sikul pali hnenah Rs. 20,000 ṭheuh leh distinction-a pass zirlai 26 hnenah Rs. 2,000 ṭheuh a pe a; HSSLC-a zirlai pass vekna sikul pathum hnenah Rs. 20,000 ṭheuh leh distinction-a pass zirlai panga hnenah Rs. 3,000 ṭheuh a pe a ni.

CEF sem
Mizoram State Rural Livelihood Mission, Kolasib district hmalakna leh Azadi Ka Amrit Mahotsav hmanna pualin nimin khan Kolasib district-a self help group (SHG) member 43 - puan ṭhui, chhang siam, eichawp dawr siam leh furniture works lama hmalak tumte hnenah community enterprise fund (CEF) Rs. 40,50,000 sem a ni.

Pipe phum dawn
SIPMIU chuan September 11, 2021 hian CM bangla leh Zarkawt Presbyterian Kohhran biak-in inkarah zing dar 9 aṭanga zan dar 8 thleng pipe phum hna an thawh dawn avangin kawngpui khar a ni dawn a; September 13 - 22, 2021 chhung Zarkawt Presbyterian Kohhran biak-in aṭanga Zarkawt kâwn inkar kawngpuiah zing dar 9 aṭanga zan dar 8 thleng pipe phum hna an thawh dawn avangin kawngpui chanve khar a ni dawn bawk. Traffic SP Rodingliana Chawngthu chuan hnathawh tibuai thei tura kawngpui sira lirthei leh bungrua dah a khap a ni.