Hlawh leh senso dangte chhut chungin Electric bill tihsan a ni - P&E Minister

Power & Electricity minister R Lalzirliana chuan hlawh leh thildanga an sensote chhut chungin department-in electric bill tihsan an rawt thu House a hrilh.

ZPM member Lalduhoma zawhna chhangin P&E Minister chuan "Tunlai electric bill pung uchuak leh meter pawh en loa bill siam tam nia sawi ri a tamna chhan chu April 1, 2021 aṭangin electricity tariff thar hman a ni a, a pumpuia tariff punna chu 20.7% a ni. Covid-19 avangin sorkarin mipui chetvel khuahkhirhna khauh tak a siam avangin bill counter hawn theih a ni lo," a ti.

R Lalzirliana chuan online-a bill pe a tlem zawk an nih avangin bill hnuhnung bera thla 3/4 bill tlingkhawmte a kal chuan bill pung a uchuak anga a tihlan thu sawiin, "Covid-19 avangin sorkarin mipui chetvel khuahkhirhna khauhtak a siam avangin meter reader-te'n energy meter reading an la thei lo," a ti a, a hma thla thum bill average la-a provisional bill an siam thu a sawi.

Zawhbelhna chhangin R Lalzirliana chuan hlawh leh thildanga an sensote chhut chungin department-in electric bill tihsan an rawt thu sawiin, "Kan hlawh tur hi kan nei ngawt lo, central-in pawisa min pek a ngai. Chu chuan a daihvek kher lo, department-te'n thawh chhuah dan an zawn ve a ngai. Bill bak hi lakluhna dang P&E dept. chuan a nei lo a ni," a ti.

P&E Minister chuan electric bill sang uchuak House-a sawi chhuah a ni chu lawmawm a tih thu sawiin, "Sorkar tana ding ni loin mipui tana dingve tho kan ni. Department-in dik loa a tisang uchuak a nih chuan tihreh dan kan zawn tlan a ngai," a ti a, meter reading laksual palh emaw, bill siam sual palh avanga bill sang zual nia hriatte chu a theih ang anga endik a, an siamṭhat zel thu a sawi.

Electric bill tihsan rawtna a luhin JERC chuan public hearing a koh thu sawiin R Lalzirliana chuan, "Hetah hian ZPM chiah an kal a, an duh lohte an sawi chhuak a ni. Anni hi chuan electric bill sang hi sawisel mah se, a awm," a ti.

P&E Minister chuan hearing-a kal duh si loa, a hnua an lim leh lehkhate hal an awm thu sawiin, "Bang turtein min duh an awm. Bill sang an duh loh chuan hearing-ahte kalve ang hmiang," a ti a, ram kalsiam tak tak ngaihtuah mang si loa, sawisel thei nih avanga sawisel ngawt chu ṭha a tih loh thu a sawi.