Vaccine dose 9,27,517 pe tawh

Kumin January 16 aṭanga September 7, Thawhlehni thleng khan Mizoramah Covid-19 laka invênna damdawi (vaccine) dose 9,27,517 pek a ni tawh.

Mi 6,60,574 hnenah dose khatna pek tawh niin, dose kima pek tawh mi 2,66,943 an awm. September 7, Thawhlehni khan mi 13,603 hnenah dose khatna 1,167 leh dose hnihna 12,436 pek a ni.

Covid-19 vaccine hi Mizoram sorkarin mi 9,27,517 hnenah a pe tawh a, chu'ng zinga mi 2,66,943 chuan dose kimin an dawng tawh. Private facility-ah mi 2,092 hnenah dose khatna leh mi 1,431 hnenah dose kima pek tawh a ni.

Covid-19 vaccine pek tawh hlâwm ṭhen (category) hrang hrang zinga vaccine dose khatna la tam ber chu kum 18-44 inkar an ni a, dose khatna 3,85,698 pek tawh a ni. Hetihlai hian, kum 18-44 inkarah full dose la an tlem ber thung a, dose khatna la tawh aṭanga 40,344 (10.45%) chiahin dose kimin an la la a ni.

Dose khatna la zat aṭanga chhuta dose kima pek tam ber chu kum 60 chunglam category an ni a, dose khatna la tawh mi 62,922 zinga 58,789 (93.43%) chuan dose kimin an la tawh. Mizorama vaccine dose khatna la tawh mi 6,60,574 aṭanga chhutin mi 2,66,943 (40.41%) in full dose an la tawh a ni.