Indo - Bangla Border trade Puitlinna atan hma la zel

MNF member Lawmawma Tochhawng zawhna chhangin Commerce & Industries minister Dr R Lalthangliana chuan Tlabung lam kaltlanga Border Trade tipuitling turin hmalak zel a nih thu House a hrilh.

Dr R Lalthangliana chuan tun dinhmunah Indo-Bangla Border Trade, Tlabung area Kawrpuichhuah kaltlanga neih tur hi hma thui tak lak a nih tawh thu sawiin, "Ram acres 21.5 a zau chu Land Port Authority of India (LPAI), Ministry of Home Affairs hnenah hlan fel a ni tawh," a ti.

Commerce Minister sawi danin, LPAI hnena ram pekah hian VC pass/periodic patta nei an awm avangin Lunglei DC hnenah chingfel tura hriattir a ni. LPAI contractor-te chu ni 28.8.2021 khan Lunglei thleng pheiin, survey an nei dawn a, kuminah hna an ṭan hman beisei a ni.

Zawhna dang chhangin Commerce Minister chuan Lunglei Super Market building thar sak tum a nih thu sawiin, "Concept note vbc. 14.50 siamin, Planning dept. kaltlangin NEC-ah thawn thlak a ni. Mizoram sorkarin priority list-ah min dahsak a, hlawhtlin kan inbeisei," a ti.

Dr R Lalthangliana chuan INC member Zodintluanga'n Indo - Myanmar Border Trade, hun reitak khar tawh kan ram dinhmun en chung leh Covid-19 awmze nei taka do chung sia hawng tura hmalakna a awm leh awm loh a zawhna chhangin, "International trade hi central subject a ni," a ti a, a hawn leh khar thuah state sorkarin thuneihna a neih loh thu a sawi.