Police-te theihtawpa thuamṭhat kan tum - Chief Minister

Home Minister a awm loh avanga a aiawha zawhna chhangtu chief minister Zoramthanga chuan Mizoram Police-te theihtawpa thuamṭhat an tum thu a sawi.

ZLP member C Lalsawivunga zawhna chhangin Zoramthanga chuan, "Mizoram - Assam ramria duty police-te ration pek an ni a, mi pakhat tan ni tin buhfai ni 2 hisap zel pek an ni. Police-te hi mimal anga hamṭhatna emaw, a hranpa-a hamṭhatna pekbelh bik turin police-te intluk tlan lohna a siam theih bakah Finance dept. remtihna a ngaih avangin kawng a thui deuh. Hamṭhatna pek belh turin hmalakna a awm rih lo," a ti.

Chief Minister sawi danin, Armed Police-te chuan thla khatah rifle allowance Rs. 40 an dawng a, Mizoram Police-te chuan ration allowance thla khatah Rs. 1,000 an dawng thung.

C Lalsawivunga'n ramria police-ten an ei leh in atan thla khatah Rs. 2,000 an thawh thu a sawi leh zawhbelhna dangte chhangin Chief Minister chuan, "Kan police-te hi theihtawpa thuamṭhat kan tum," a ti.