Khawzawl dist.-a restricted area pathumah Chhungkaw chhawmdawl ngai 386 an awm

Khawzawl District Disaster Management Authority (DDMA) chu an chairman CC Lalchhuangkima, bawrhsap hoin DC conference hall-ah September 7, Thawhlehni khan an ṭhu a, Khawzawl khawpuia Covid-19 mass testing kalpui mek dan leh Covid-19 vanga restricted area-a puan Khawzawl, Chawngtlai leh Biate khuaa chhungkaw harsa zual 386-te ṭanpui dan tur an sawiho.

Restricted area-a puan khaw pathumah hian task force-te chhinchhiah danin Covid-19 inkhuahkhirhna avanga hnathawk thei lo, chhuanchham leh chhuanchham dinhmuna ding thei chhungkaw 386 an awm a - Khawzawlah chhungkaw 279, Biateah chhungkaw 99 leh Chawngtlaiah chhungkaw pariat an ni.

DDMA chuan chhungkaw harsa zual 386-te tan Chief Minister’s Relief Fund aṭangin chhawmdawlna sem thuai nise, a ṭul anga thawhhopui tur leh hma lakpui turin Khawzawl Officers Club sawm nise, an ti a; bialtu MLA Tawnluia, deputy chief minister ni bawk hmalaknain Covid-19 mass testing atan test kit 7,000 hmuh a nih dawn thu an tarlang.

September 2-7, 2021 thleng khan Khawzawl khawpui veng 10-a mass testing neihah sample 5,095 test aṭangin hri kai mi 11 hmuhchhuah a ni tawh a, positivity rate hi 0.22% a ni.

Bawrhsap hian Chief Minister’s Relief Fund aṭanga lei Covid-19 dona hmanrua chi hrang hrang Khawzawl additional SP Lalringliana hnenah a hlan.