Mizoram sorkar leh HPC (D)-te'n April 2-ah inremna an ziak dawn

Bru hruaitute'n chhawmdawlna sum sumdawnna atan an hmang - CM Hawla

March 29, Ningania Assembly session-ah chief minister Lal Thanhawla chuan, Mizoram sorkar leh HPC(D)-te'n April 2, 2018-ah inremna thuthlung an ziah tur thu a sawi a; Tripura-a Bru refugee camp-a an hotute'n chhawmdawlna sumte sumdawnna atana an hman ṭhin avangin, Bru-te Mizorama an kîr an phal loh thu House a hrilh.

A department-te demand sawihona a khaikhawmnaah Chief Minister chuan, Mizoram sorkar leh HPC-(D) ten inremna April 2-ah an ziah tur thu sawiin, "Inremna hi Easter Monday-ah ngei ziah ni se kan duh a ni. Mizoram sorkar aiawh chuan inremnaah hian Chief Secretary-in hming a ziak ang. Inremnaah hian sàwm âwm deuha ngaihte sâwm a ni dawn," a ti.

Tuivawl bialtu MLA RL Pianmawia pawhin, Mizoram sorkar leh HPC(D) inremna angin Sinlung Hills Development Council (SHDC) ṭhiatin thuneihna sang zawk council din a nih dawn thu a sawi.

RL Pianmawia chuan, inremna angin GAD hnuaia awm SHDC aiah a hranpaa budget nei tur Sinlung Hills Council din a nih dawn thu a sawi a, "Budget hran nei council a pian dawn tâk avang hian hmasawnna lamah hmar lamin hma a sawn ngei ang," a ti.

Mizoram sorkar leh HPC(D) inremna hi April 2-ah ziah a ni ang a, HPC(D)-te'n an ralthuam an tun hun tur chu ṭum dangah a ni dawn a, a hmun atan CTI, Sesawng ruahman a nia thu dawn a ni.

CM Lal Thanhawla chuan, "Refugee camp-a Bru hotute'n rehabilitation sum sumdawnna atan an hmang ṭhin a, an sumdawnna a tawp an hlauh avangin Mizorama an rawn haw an phal lo. Haw duh an awm a, an rawn haw zeuh zeuh a, ṭha takin kan lo chhawmdawl a, NLUP-te pawh kan pe. An sumdawnna a tawp an hlauh avang hian thil tih theih loh tur an demand a, an la dan theih phah deuh," a ti.

Lal Thanhawla chuan, Bru-te chu 'Kal su, hlauhawm a awm lo' sorkarin a ti chungin an kal luih thu sawiin, "Tum lâwkte an lo nei a niang. Khatih hun laia Home minister LK Advani phei chuan NGO leh sorkar ṭangrual a, Bru-te Hindu-a leh luih tum a, an duh loh avanga ûm chhuak luiah Mizoram sorkar a puh a, Hindu temple eng emaw zat tihchhiat a nih thu pawh a sawi a ni," a ti a; RSS-te pawhin open letter an thawn thu a sawi.

Chief Minister chuan, thil awm dan hriat fiah a nih theihna atan phai lam media-te koh chhuah an nih thu sawiin, "IPR department-te nen thawkhoin, Bru a tam thei ang ber hmu turin kan ti a ni. Phai media-te rilru kan hneh a, heta ṭang hian sorkar laipuiin min puhna pawh a reh deuh. Thil awm dan dik tak chu a rawn lang chho zel a nih hi," a ti.