Candidate laka sum beisei lova ṭan­pui zawk turin ZPM-in mipui a ngen

Zoram People's Movement (ZPM) Ṭangrual Pawl chuan, kumin kum tawpa MLA inthlan hunah, Ṭangrual Pawl candidate-te chu vote zawn nana sum hmatheh a remtih loh tur thu a puang.

March 29, Ningani khan ZPM Finance Committee chuan inthlan hmachhawn tak tak huna sum chelek uar lutuk lo tura inzirtir inkhawm 'ZPM Conclave' Chaltlang Tourist Losge-ah a buatsaih a, Ṭangrual Pawl hruaitu leh worker ṭhahnem tak an tel.

Inkhawm kaihruaitu ZPM treasurer F Rodingliana chuan, MLA inthlan hunah Ṭangrual Pawl chuan senso tur sum neite chauh a vawrh chhuak dawn lo tih a sawi a, ram vei, mi rintlakte candidate atan a vawrh chhuah dawn avangin, Ṭangrual Pawl candidate-te laka sum lo beisei lo a, a

ṭul ang anga lo tanpui zawk turin mipuite a ngen a, mipui sorkar a din theih nan, mipuiten thawhlawm an thawhna tur open account MRB Treasury Square Branch-ah Mipui Buhzem tih hming vuahin hawn a nih thu a sawi.

Thupui sawitu PL Liandinga chuan Mipui Buhzemah tlem lua awm lova thawh turin mi tinte a ngen a, "Ṭangrual Pawl sorkar a lo din hlauh chuan, Mipui Buhzema tlem te pawh lo thlaktu apiangte chu sorkar lakah an thikthu a chhe ngam dawn a, roreltute tan inlulin chiam a rem tawh lo ang, chu kalphung thar chu Ṭangrual Pawl hian tun din kan tum a ni," a ti.

Thusawitu dang K Than­zauva chuan Ṭangrual Pawl-in mi hausate chauh candidate-a thlang lo a, hmangchang hria leh rorelna ṭha duhtute an candidate theihna turin, Mipui Buhzemah thla tin Rs. 2000 a thawh tur thu a puang a, ZPM vice chairman Lalthansanga (Chatea) pawhin MLA a chuh ve ṭuma thilpek Rs. 10,000 a dawn chu inthlan zawh hnuah a rulh leh thu sawiin, thianghlim taka vote zawn nan sum tam tak a ṭul loh thu a sawi.

Hunserh hmang paha thu sawitu R. Vanlalzauva chuan Mizoramah sorkar rintlak a pian theihna tura Ṭangrual Pawl inbuatsaih dan chu hun rei tak aṭanga Mizoram mipuiten an lo thlir a nih thu sawiin, hlawhtlinpui turin duhsakna a hlan.