MJA-in Book Donors’ Meet an buatsaih

MJA Public Library Sub-Committee chuan March 29, Ningani khan Aizawl Press Club-ah Book Donors’ Meet an buatsaih a, MJA Public Library-a lehkhabu petu eng emaw zatte nen hun an hmang a, MJA president Vanlalrema Vantawl-in a hmanpui.

Book Donors’ Meet hi MJA Public Library Sub-Committee chairman Zonun­sanga Khiangte, MJA vice president-in a kaihruai a; MJA president Vanlalrema Vantawl chuan, Mizo mipui, a bikin ṭha­laite'n social media an âtchilh mek chu lehkhabu hmanga do lêt a ṭul thu leh print media tihhlut zel a ngaih thu a sawi.

MJA President chuan, naupangte tana lehkhabu chhiar tur ṭha dap khawm kawngah nu leh pate'n ṭan an lak a ngaih thu sawiin, "Ṭhalaite pawhin lehkhabu chhiar ngai loh chuan finna tluantling a awm ngai lo tih an pawm a ngai," a ti a; digital khawvel inhnehtir lo turin a chah. MJA Library tana lehkhabu petute chu MJA-in a ngaihlu a, an chungah MJA a lawm hle tih a sawi bawk.

MJA Public Library Sub-Committee secretary PB Lalrammawia report peka a lan danin, MJA-in kum 2001-ah Public Library Sub-Committee a din a; chutih laia Mizoram Lok Sabha MP Vanlalzawma’n Local Area Development Fund aṭangin Library leh Guest House sakna tur Rs. 3,00,000 a pek hmangin library tur sak a ni a, chu chu May 14, 2002-ah MP Vanlalzawma'n a hawng.

MJA Library chu March 18, 2008-ah chutih laia MJA president K Sapdanga’n a hawng a; January 1, 2014-ah Mizoram State Library aṭang­in recognition hmuh a ni.

MJA Public Library-ah hian lehkhabu 5,217 a awm mek a, chungte chu lehkhabu chi hrang 2,000 vel a ni. Mimal, pawl, kohhran leh sorkar department hrang hrangin lehkhabu ṭhahnem tak an pe tawh a, lehkhabu petu zingah mimal 600 vel an awm a ni.