Court-in Revenue dan hman a phal lo Kan khinglet leh mek - Revenue Minister

Land Revenue & Settlement (LRS) minister R Romawia chuan, The Mizoram Land Aquisition, Rehabilitation and Resettlement (MLARR) Act, 2016 chu Gauhati High Court, Aizawl Bench-in hman theih loh tura a tih thu leh, Court thu chu sorkarin a khin lêt mek thu Assembly House a hrilh.

MNF member Lalrinawma zawhna kal zelah LRS Minister chuan, compensation chungchangah Mizoram sorkar chu Court-ah khin a nih thu a sawi a, "He thubuai remnaah hian MLARR Act, 2016 chu President pawmpuina ziah a nih loh avangin hman theih loh turin a ti a ni. Thutlukna siamtu chu Aizawl Bench-a single bench a ni a, division bench lamah kan khinglet leh mek a, kan ngaichang mek a ni," a ti.

R Romawia chuan, MLARR Act, 2016 siam a nih chhan sawiin, "Kum 1984-a kan dan neih hman ngar ngar a ni a, kum 2013-ah Parliament-in India ram puma hman tur dan a siam tak avangin 1984-a kan dan neih hi hman theih a ni ta lo. Constitution-in thuneihna min pek angin Mizoram bikin kan hman turin MLARR Act, 2016 hi duan a ni," a ti a; MLARR Act atan hian Governor pawhin pawmpuina a pek thu a sawi.

MLARR Act hnâwl a nih avangin Mizoramin ram lak leh zangnadawmna pek chungchangah dan hman tur a neih loh thu sawiin R Romawia chuan, "Chuvangin, Aizawl-Tuipang kawng double lane-a laih tur atan National Highway Act, 1956 hman tum a ni. He dan hnuaiah hian ram lak hna chhunzawm turin inpuahchah mek a ni. Court thutlukna vanga kan hmalakna a ṭhuanawp takah chuan hmasawnna hna tihṭhuanawp loh dan kan ngaihtuah a, NH Act hi kan hmang dawn a ni," a ti.

LRS Minister sawi danin, Aizawl-Tuipang kawng double lane-a laih turah hian mi 3,288 hnen aṭangin ram lak tum a ni a, ram lak tum zau zawng chu preliminary notification angin hectare 399.22 a ni. A ram hlut záwng chhût chhuahsak an la ni lo.

Notified town loah chuan V/C-te'n in hmun an pek theih loh thu sawiin, "Lo leh huan tur erawh an pe thei lo. Tun hma chuan kum khat chhung atan V/C-in ram an ṭheh ṭhin a, a nghet tur erawh chuan an pe thei lo," a ti.