LADC budget session ṭan a ni

Lai Autonomous District Council (LADC) budget session chu March 29, Ningani aṭang khan ṭan a ni a, chief executive member (CEM) T Zakunga'n kum 2018-19 atana LADC budget ruahman, cheng nuai 14794.70 a pharh. Tun ṭum session-ah hian zawhna starred question pakua leh un-starred question pahnih a lut.

T Zakunga chuan session-ah hian Internal Audit Wing neih tura ruahmanna siam a nih thu te, LADC hnuaia zirtirtute tan in-service training mumal leh ṭha zawka neih tura ruahmanna siam a nih thu te, session hnuhnung bera House-in a lo pawm tawh MDC-te fund (discreation fund) a lêta tihpun tura ruahman a nih thute a sawi.

Session ni khatnaah hian kumin chhunga LADC member ni tawh thi pathum - Lalbiakthanga, L Chinzah leh B Thanchunga te sûnna hun hman a ni.