Zirtirtu 254 office-ah dah an ni

School Education minister H Rohlun­a chuan MNF member Lalrinawm­a zawhna chhangin, tun dinhmun­ah zirtirtu, department office lama dah (attached) 254 an awm thu Assembly House hrilh a, "Zirtirtu indaih lohna vangin an aiawh sikulah dah a ni lo," a ti.

H Rohluna chuan zawh belhna chhangin, CSS Hindi zirtirtu bàn takte chu dah leh turin sorkar laipui an nawr reng thu a sawi a, "Sum awm reng laia min pek duh loh chuan a ngaihna a awm lo. CSS Hindi zirtirtute awmna ṭhin hmuna Hindi zirtirtu nghet sate dah a, post siam rem duh mah se, zirtirtu an indaih lo hrim hrim. Hindi zirtirtu neih lohnaah chuan Hindi an zir lo maiah kan ngai. Hmun ṭhenkhatah chuan MLA bakah, zirtirtu leh zirlai nu leh pate'n Hindi zir loh ngawt ai chuan Hindi zirtirtu tur an ruai a ni," a ti.

INC member John Siamkunga'n South Vanlaiphai Higher Secondary SChool mipui ṭangrualin an din chu adhoc aided status-ah dah theih a nih leh nih loh zawhna chhangin School Education Minister chuan, private school khawtlangin a dinte zir chian mek a nih thu a sawi a, "A ṭul anga hmalak zel tum a ni," a ti.

H Rohluna chuan INC member TT Zothansanga zawhna chhangin, zirtirtu indaih lohna sikulte hnenah zirtirtu pek tur an awm hunah pek tum a nih thu House a hrilh.

INC member Lalrinliana Sailo zawhna chhangin minister H Rohluna chuan, tun dinhmunah zirtirtu pakhat chauh awmna sorkar sikul 27 (primary school vek) a awm thu a sawi a, "Sorkar sikul 17-ah zirtirtu nghet an awm lo a, hengte hi primary school 16 leh middle school pakhat a ni," a ti.