Legislative Assembly session a ṭiak ; Tu sorkarah pawh fûr lai chuan kawng a chhe ṭhin a ni - CM

September 7, 2021-a ṭan Mizoram Legislative Assembly pariatna session vawi riatna chu nimin khan a ṭiak. Session tàwp ní-ah hian PWD changtu chief minister Zoramthanga chuan, tu sorkarah pawh fûr laiin kawng a chhiat ṭhin thu a sawi.

Assembly speaker Lalrinliana Sailo chuan, session tluang taka a kal thei chu lawmawm a tih thu sawiin, "Ṭhahnemngai takin ram leh hnam tan rilru in séng a, in thawhrimna a lawmawm. Session hlawhtling taka neih a nih theihna atana thawktute thawhrimna a fakawmin a chhuanawm tak zet," a ti.

ZLP member Lalchhuanthanga'n Mizo­rama kawngte a chhiat em em reng thu a sawi chungchangah CM Zoramthanga chuan, "Fûr lai chuan tu sorkarah pawh kawng a chhe reng ṭhin tih hriat a ni," a ti a, kawng ṭha reng tur chuan sum sanction a tam a ngaih thu a sawi.

Lalchhuanthanga chuan, PWD-in sum an hmu tam ṭhin chungin kawng a chhe em em reng nia sawiin, "Kawng chhiat hma chhan, a hun taka zawh loh chhan hi eng nge ni ang? PWD hotute chuan contractor kan ngam lo, kan thusawi an zâwm lo, an ti. Hetiang zat sum hman a ni chunga kawng a chhe si hi contractor nge, a enkawltu nge, hna petu mawhphurhna ni ang?" a ti.

INC member C Ngunlianchunga pawhin Bungtlang South leh Sakei lui inkar leh, Hrangchalkawn leh Lawngtlai inkar kawng a chhiat tak zet thu sawiin, "Congress sorkar laiin kawng a chhia a, MNF sorkarah chuan a rapthlak a ni," a ti a, kawng siamtute a siamṭhat hna thawk tura hrilh turin Chief Minister a ngen.

Chief Minister chuan, Mizoram chu ruahtui tlâk tamna a nih thu sawiin, "Ruahsûr tak tak chuan alkatra-te a chhe chak hle, mi ram aiin a chhe chak. Ruah a lo sûr a, leiminin side drain a hnawh a, kawngpuia tui a lo tlinin alkatra-in tui a ngam lo. Contractor-te chuan kan lung neih ṭhat lohte pawh an puh," a ti.

Fûr lai a nih piah lamah Covid-19 avangin hna thawh a harsat thu sawiin Zoramthanga chuan, "Covid-19 avangin kawng chhia hi a zualkai lo thei lo. Labour tur zawn hmuh ringawt pawh a harsa," a ti a; kawng chhe em em lai a awm rualin, kawng ṭha em em lai pawh a awm thu a sawi.

Chief Minister sawi danin, PWD chuan hna ṭha lo an enfiah a, chu chu executive engineer chinin hoin, officer panga an awm a ni.