Covid-19 donaah induhkhawp a har - Health Minister

Nimina Assembly session-ah Health minister Dr R Lalthangliana'n special mention hun a hmang a; Covid-19 donaah induhkhawp a har hle tih a sawi rualin, sorkar leh mipui ṭanghoin hripui an do dan chu a ṭha thawkhat hlê niin a sawi. Dedicated covid health centre 13 hawng turin ruahmanna siam a nih thu a sawi bawk.

Health Minister chuan, "Covid-19 donaah hian induhkhawp a har em em a, theihtawp kan chhuah tak meuh chung hian keini ngei pawh hian kim lo tih kan ngah ve tho. Chutih rual chuan, Zoram mipui leh sorkar ṭanghoin hripui kan do dan hi a ṭha thawkhat hle tih erawh huai takin a sawi ngam àwm e," a ti.

Mizorama positivity rate a sàn chhan chu sûlhnu chhui lam an tih ṭhat vang nia sawiin Minister chuan, "Kai tûra rinhlelh hlir kan test avangin kan sang lo thei lo. State dangah chuan mass testing an tih pawhin rél station-ah te, vaccine lâkna hmunahte an test chauh a, positivity rate a sang thei lo. State dangah chuan contact tracing an ti tawh mang lo, an tihna a la awm a nih pawhin keini anga uluk leh chipchiar hian an ti ve meuh tawh lo," a ti.

Hripui la lêng reng mah se India rama state dangte nen khaikhinin Mizoram dinhmun chu a la ziaawm hle nia sawiin R Lalthangliana chuan, "Kan zavaia kan thawhhona a ṭhat vang a ni a, thukhat vuaa kan ṭanhona rah a ni," a ti a; mipui leh páwl hrang hrangte chungah lawmthu a sawi.

Covid-19 thawh khatnaa kum 2020 chhungin sorkar laipuiin Mizoramah Covid-19 positive 5,000 awm tura an chhût laiin, 4,216 chiah an awm tih sawiin R Lalthangliana chuan, "First wave kan tih mai hi kumin March thla thleng a ni a, hemi chhunga positive kan neih chu 4,476 a ni a, nunna chán mi 11 an ni," a ti.

Health Minister chuan, Covid-19 thawh hnihnaah virus insiam danglamin, Delta Variant a chhuak tih sawiin, "Kumin April thla aṭang khan hri kai kan pung chak hle. April-ah positive 1,655, May-ah 6,268, June-ah 8,093, July-ah 18,433, August-ah 21,074 a ni," a ti a; thla kal mek September thlaah ni riat chhûngin positive 6,911 an awm thu a sawi.

Covid-19 second wave atan theihtawpin an inruahman nia sawiin R Lalthangliana chuan, "April thla tìra ZMC-a khum 210 zinga 56 chu Covid bik atan siam a ni phawt a. May thlaah ICU awm sa khum 13 bakah ICU extension khum 21, a vaiin ICU khum 34 leh hospital khum zawng zawng Covid ward-ah siamin khum 247 a lo tling. June leh July thla khan Covid ward thar pahnih khum 60 awmna hawn belh a ni a, a vaiin ZMC-ah khum 307 siam a ni ta," a ti.

Health Minister chuan, Covid-19 third wave thleng thei atana sorkar inpuahchah dan sawiin, naupangin an tuar na dawn an tih avangin naupang enkawlna tur lam hawiin hmalak a nih thu a sawi a, "ZMC-ah NICU khum 10 awmna kan peih ṭêp a, kum 25 thlenga belh theih tura ruahman, ventilator leh oxygen support tur a ni. PICU ward khum 10 awmna peih ṭêp tawh a ni," a ti.

Dr R Lalthangliana chuan, Covid-19 dona chungchangah rorel thiam a harsat thu sawiin, "In duhthusam loh thil tam tak kan dài sual palh a awm ang tih ka ring, in hriatthiamna leh ngaihnathiamna thinlung takin ka ngen e," a ti a; Pathian hnena ṭhahnemngai taka ṭawngṭai turin mi tin a ngen a ni.