Chhungkaw 2 luah lai in a chim

ITI Veng huam chhung, Bethel Venga Lalnunziri in Assam type, chhungkaw pahnih luah lai chu nimin zing zing dar 5:30 vel khan a chim a, thi leh hliam an awm lo.

Thu dawn danin, Lalnunziri in hi kawng dâwlna lungrem chimin a chimpui nia hriat a ni a, a chim hmaa a chêt avangin in chhunga awmte páwn lamah an tlân chhuak hman a, bungrua erawh an chuh hman lo thung.

ITI Vengah Covid-19 vei mek mi 100 chuang an awm avangin a náwlpuia hnatlang koh a remchang lo a, Mualpui lamin hnatlang an ko a, DC pisaa Disaster Management lam mite nen bungraw senghawi hna nimin khan an thawk.

Chhiatna tâwkte puih nan minister of state Robert Romawia Royte chuan Rs. 5,000 a pe a, Congress ṭhalai president Dr Lalmalsawma Nghaka chuan nimin zing khan a hmunah tlawhin, silpauline pahnih, rangva phek 28 leh hnatlangte mamawh atan Rs. 5,000 a pe. ITI Middle School-in buhfai ip khat, UPC (North East India) Mualpui kohhranin Rs. 5,000, Aizawl DC leh Salem Veng YMA-in Rs. 3,000 ve ve, Aizawl South-II Congress Block president Lalduhawma'n Rs. 2,000 an pe bawk.