Minister sawi leh IDSP record a inang lo

Nimina Assembly sesson-ah Health minister Dr R Lalthangliana chuan, Mizorama swab sample endik zawng zawng zinga 59.49% chu RT-PCR leh a tlukpui kháwl chi hnih hmanga endik a nih thu a sawi. Chutih laiin, September 7, 2021 thlenga RT-PCR leh a tlukpui kháwl hmanga sample endik zat chu 32.61% niin a lang.

Health Minister hian September 7, 2021 thlenga Covid-19 chungchanga Mizorama dinhmun a sawi a, chu chu September 8, 2021 report a ni. Sample endik ngaite a hun taka endik a nih theih nan theihtawp an chhuah a, district tinah TrueNAT kháwl dah kim vek tawh a nih thu a sawi.

Dr R Lalthangliana chuan, "Sample test dan chungchangah ICMR chuan RT-PCR/TrueNAT leh CBNAAT-te hi an thawh dan thuhmun a nih avangin huang khatah a dah a, sample test zat tur percentage a bituk tih pawh kan hria a. Amaherawhchu, state dangte hian min lo tluk lo hle mai tih IDSP data thar berah kan hmu a, sample test zawng zawng zinga 59.49% hi RT-PCR leh a tlukpui kháwl chi hnih hmanga test a ni," a ti.

Hetih lai hian, ni tin tlai lama IDSP Bulletin tihchhuah ṭhinah RT-PCR leh TrueNAT hmanga swab sample endik zat tarlan ṭhin a ni a, CBNAAT hmanga endik tarlan a awm ngai lo. September 7, 2021 thlenga RT-PCR leh TrueNAT hmanga sample endik zat chu 3,02,928 a ni a, chu chu endik zawng zawng aṭangin 32.61% a ni.

RT-PCR leh TrueNAT hmanga sample endik zat Health Minister-in nimina Assembly House-a a sawi, 59.49% tih hi IDSP Bulletin-a tarlan anga chhût chhuah 32.61% aiin 26.88%-in a sang zawk.

September 7, 2021 thlenga sample endik dan chu, endik zawng zawng 9,28,823 aṭangin - RT-PCR hmangin 26.67% (2,47,690), TrueNAT hmangin 5.95% (55,238), RAT hmangin 67.28% (6,24,931), FIA hmangin 0.10% (906) leh state páwnah 0.006% (58) a ni.

IDSP Bulletin nimin tlaia tihchhuaha a lan danin, Mizoramah swab sample 9,39,297 endik a ni tawh a, chu'ng zinga sample 6,33,090 chu Rapid Antigen Test hmanga endik niin, sample endik zawng zawng zatve aia tam, 67.40% a tling.

ZMC laboratory-a RT-PCR hmanga sample endik zat chu 2,49,270 niin, endik zawng zawng aṭangin 26.54% a ni a; TrueNAT-PCR hmanga endik tawh zat chu 55,882 niin, endik tawh zat aṭangin 5.95% a ni. RT-PCR leh TrueNAT hmanga endik zat belhkhawm chu sample 3,05,152 niin, endik tawh zawng zawng 9,39,297 aṭangin 32.49% a ni.