Aibawk Sports Complex zo thuai turin ngen

ZPM party hruaitute chuan nimin khan Aibawk Mini Sports Complex siam mek a hmunah an enfiah a; Sports Complex sak hna chu langtlang leh ṭha taka thawk a, zo thuai turin sorkar an ngen.

ZPM tarlan danin, Aibawk Mini Sports Complex project hi May 5, 2017-ah pawm niin, NLCPR aṭanga sum hmuh hmanga siam a ni a, kum hnih chhung - May 5, 2019-a siam zawh tura tih a ni.

Chhan hrang hrang vanga a hunah zawh hman a nih loh hnuah zawh hun atan April 11, 2021 bituk leh a ni a, mahse, tun thlengin zawh a la ni lo.

Mini Sports Complex hi Rural Development department hnuaiah cheng nuai 400 sénga sak tura ruahman a ni a, restricted tender niin, NECS-in an thawk. March 2018-ah thawh ṭan niin, chutih laia NECS hotu Robert Romawia Royte-in hna bul a ṭanpui a ni.

Aibawk Mini Sports Complex siam chu a muan êm avang leh khawtlang mipui an mangan tawh avangin Aizawl South-I bialtu MLA C Lalsawivunga'n September 2, 2021-ah a tlawh tih sawiin ZPM chuan, "MLA-in a tlawh lai hian Aibawk field hi khaw ram hluihlâwn tawh ang maiin hnimin a bawh khat vek a, Field kaltlanga thlànmual panna kawng pawh hnatlanga sàm fai ngai hial khawpin a awm a ni," an ti.

MLA C Lalsawivunga’n a tlawh thu chuan sorkar beng a thleng nghal tih sawiin ZPM chuan, "A tlawh tûk September 3-ah field chu an sàm faitir nghal rum rum a, mihring thâ ringawta a sâm fai chi a nih tawh loh avangin September 4 khan excavator (JCB) an ruai hial a, September 6-ah pawh sâm chhunzawm zelin, September 7 chawhnuah RD minister Pu Lalruatkima'n bialtu MLA leh official-te hruaiin a tlawh ta a ni," an ti. Minister-in hna thawh chak loh chhan a sawi chu chhuanlam tlinga an ngaih loh thu an sawi.

ZPM chuan, nimina Aibawk field an tlawh lai hian hna an lo thawk a, a hmunhmáte pawh theih ang anga an tihfai bakah an lo siam rem tih an sawi a, "Khawtlang mipui pawhin hlamchhiah anga an lo ngaih tawh chhunzawm leh a ni hi lawmawm kan ti hle. He Mini Sports Complex hi a nih dan tur ang taka ṭhaa thawk zo thuai turin kan beisei a ni," an ti.