KHAWTHLIR

Dan kalh lo
Horticulture changtu chief minister Zoramthanga chuan ZPM member Dr Vanlalthlana zawhna chhangin, Dendroclamus Brandisii/Latiflorus leh Dendrocalamus Sikkimensis tender chhànnaah dan kalha hmalakna a awm loh thu Assembly House a hrilh.

Awareness campaign
Rashtriya Poshan Maah (National Nutrition Month) hman mekah nimin khan Department of Women & Child Development, AYUSH leh Mizoram State Rural Livelihood Mission-te chuan ‘Awareness campaign on Ayush practises for better nutrition’ tih hun an hmang.

AR-in rifle man
Serchhipa hmunpui nei Assam Rifles-te chuan nimin khan Champhai bul, Chhungte khaw huam chhungah .22 Rifle pakhat an man a, a kaihhnawihah mi pahnih an man bawk. Rifle leh mi pahnihte chu nimin khan Champhai Police hnenah an hlân a ni.

Sangha no sem
Mamita Fisheries dept. chuan nimin khan SEDP hnuaiah sangha no 1,00,000 an sem. Senso zinga 70% chu sorkarin a tumsak a, sangha khawitute'n 30% an tum thung a, sangha no pakhat Rs. 1.20 man a ni. Sangha hi Mamit, Phaizau, Darlak leh Kawrtethawveng khuaah sem ṭan niin, khaw 40 chuangah sem leh tum a ni.

TiLi Center hawng
Labour Employment, Skill Development & Entrepreneurship director K Lalhmingliana chuan nimin khan TharThilThlenTu (TiLi) Center, Mission Venga mi a hawng. TiLi Centre-ah hian learning space, private office mamawhte inhman ṭâwm theih tur co-working space, training center leh meeting room hman hawh theih leh startup company-te enkawlna hmun incubation center-te a awm a ni.