MPYCC-in Zira bang turin an phût nawn

Mizoram Pradesh Youth Congress Committee (MPYCC) chuan Power & Electricity minister R Lalzirliana chu electric bill sang kaihhnawih avangin a mawhphurhna hlen zo loah an ngai a, PE minister a nihna aṭanga báng turin an phût nawn.

Electric bill sang avanga August 24, 2021-a Vanapa Hall kawta lungawi lohna lantirtute a dem thu PE minister R Lalzirliana'n September 8, Nilainia Mizoram Assembly session-ah a sawi chiam tih tarlangin MPYCC chuan, Congress ṭhalaite hmalakna chu Joint Electricity Regulatory Commission (JERC)-in rawtna a siam hun laia sawi loah a puh chu thil nihna dik tak pehhêl kualna mai a nih thu an sawi a, "MPYCC-in lungawi lohna a huaihawt chhan chu meter reading neih mumal loh leh dik tâwk lo a tam avanga electric bill uchuak a ni," an ti.

MPYCC chuan, "Covid-19 vanga mipuiin sum leh pái lâk luhna mumal an neih loh laia JERC chhiah tihpunna 20.68% ni lo, 200-500% lai punga sorkarin mipuia electric bill a ṭhing nihna dik tak hi minister R Lalzirliana hian Assembly House-ah dawihzep takin a auchhuahpui ngam lo a ni," an ti.

R Lalzirliana'n mipui harsatna leh manganna deusawh taka a sawi chhuah tawh thu leh electric bill complaint-tute chu ár ruk hmang, drug ngawlvei leh misual angahte a puh tawh thu an sawi.

Congress ṭhalaite chuan, PE minister R Lalzirliana'n meter reading neih loh leh dik tâwk lo vanga electric bill sáng uchuak tak a sawi lang duh lo chu an dem thu an sawi a, "Mipuiin a lo thlàwna sum tam tak an chawi tur ngaihtuah duh loa thiam channa lai chauh sawi tumtu, mahni mawhphurhna hlen zo lo Pu R Lalzirliana hi PE minister a nihna aṭanga báng turin kan phût nawn a, kan ûm zui zel dawn a ni," an ti.