Ramri chingfel turin sorkarin ruahmanna a nei - Home Minister

Congress Legislature Party leader Zodintluanga Ralte zawhna chhángin Home minister Lalchamliana chuan, Mizoram leh Assam ramri chingfel turin Mizoram sorkarin ruahmanna a neih thu House a hrilh.

Home Minister tarlan danin, Mizoram leh Assam ramri buai zir chiang turin July 16, 2018 khan sorkarin Home department Additional Secretary kaihhruai Core Committee a din a, chu chu February 28, 2019 khan Chief Secretary kaihhruaina hnuaiah din thar leh a ni. Core Committee hian Mizoram leh Assam ramri kaihhnawih lehkha pawimawh hrang hrang leh topo sheet-te la khawmin an zirchiang mek.

Chumi hnuah Ministry of Home Affairs aṭanga hriattirna dawn angin report thehluh a ni a, ramri buai chungchanga indawrna turah nodal officer ruat a ni bawk. Mizoram leh Assam ramri buai chungchanga MHA Nodal Officer pawh meeting neihpui a ni tawh.

MHA-in a ruat, Manohar Parrikar Institute of Defence Studies and Analysis aṭanga lo kal tur mithiamte hnenah Mizoram ṭan chhan leh a kaihhnawih lehkha pawimawhte buatsaih turin Mizoram sorkarin team a din tawh a; ramri buai chungchanga hmalak zel dan tur ngaihtuahtu tur political party leh pawl hrang hrang aiawh telna Boundary Committee din a ni bawk.

INC member Lalrindika Ralte zawhna chhángin Home Minister chuan, Thinghluna John Zolawma huan thlai Assam police-te'n an tihchhiatsak chhawmdawlna tur chu tun dinhmunah Mizoram sorkarin pek tumna a neih loh thu House a hrilh a, "A tichhetu Assam sorkar hnenah Mizoram sorkarin zangnadawmna a phût tawh," a ti.