MPCB chairman ruatin sawi a hlawh
Nimina Assembly session-ah Mizoram Pollution Control Board (MPCB) chairman ruat chungchangin sawi a hlawh a; Environment, Forest & Climate Change (EFCC) minister TJ Lalnuntluanga chuan, recruitment rules awm hmain MPCB chairman ruat a nih thu House a hrilh.
INC member Lalrindika Ralte zawhna chhangin TJ Lalnuntluanga chuan, "Kum 2020 hma lamah MPCB chairman atan recruitment rules a awm loh avangin ruatna tehfung a awm lo," a ti.
Lalrindika Ralte chuan, tuna MPCB chairman ni mek chu Supreme Court, Air Control Act leh Water Control Act-in qualify lo a tihte zinga mi a nih leh nih loh a zawh belh.
ZPM member Lalduhoma pawhin, recruitment rules chu tu emaw tinzâwn ràna siam a an theih thu sawiin, "Hetianga recruitment rules siam hi tun hmain a lo awm tawh ṭhin. Tuna MPCB chairman ruat a nih dawn hian advertisement siam a ni em?" a ti.
EFCC Minister chuan, MPCB chairman ni mek chu rules awm hmaa ruat a nih avangin advertisement chhuah leh chhuah loh tur tih a awm loh thu sawiin, "Dan a awm lo chung chungin uluk taka thlan a ni," a ti a, tuna an ruat chu diltu awmchhun a nih thu a sawi.
Recruitment rules-ah dan lam thiam dah pawimawh a nih chhan sawiin TJ Lalnuntluanga chuan, "Tunlai khawvel changkang zela case a pun zel avangin dan lam thiam an pawimawh tiin, RR-ah court lampang experience nei kan dah tel a ni," a ti.
Document-a a lan dan in , MPCB chairman Recruitment Rules chu July 30, 2021-ah The Mizoram Gazette-ah notification chhuah a ni a (No. A.12018/1/2005-FST); RR tihchhuah hnu August 3, 2021-ah R Thanga, MJS (Rtd) chu MPCB Chairman atan ruat (appoint) a ni (Ref: No.A.22012 /1/ 2020 - FST Govt. of Mizoram, EFCC Deptt.). MPCB website-ah chuan R Thanga chu August 9, 2021 aṭangin chairman a ni ṭan anga tarlan a ni bawk.
MPCB chairman ruatna tehfung
Recognised university-a bachelor's degree nei
Environment venhim lama tawnhriat nei
Control of water pollution leh maintaining restoring of whole-someness of water lama hriatna leh tawnhriat nei
Kum 10 aia tlem lo district judge ni tawh, recognised university aṭanga environmental science emaw environmental law degree nei
District court emaw high court-a kum 10 aia tlem lo ukil practise tawh, recognised university aṭanga environmental science emaw environmental law degree nei