Covid-19 vei mi 2 thih belh
Nilaini zan leh nimin khan Covid-19 vei mi pakhat ve ve an thi a; sorkar chhinchhiah angin, nimin tlai dar 5 thleng khan Mizoramah hripui vei mi 230 an thi tawh.
Covid-19 vei enkawl lai T Rotluangi (81), Lunglei Zotlang chu Nilaini zan zanlai dar 12 (September 9) khan Lungleia dedicated covid health centre (DCHC), Pûkpuiah a thi. Covid-19 positive a ni tih September 6 khan hmuh chhuah a ni a, September 8 khan Pukpui DCHC-ah dah luh a ni.
Nimin zing dar 8:31 khan Lalhmingmawia (58) h/o Lalduhawmi, Bawngkawn chu hripui vangin State Referral Hospital-ah a thi a, hripui vanga thi 230-na a ni. Amah hi lung leh chuap ṭha lo nei sa a ni a; Covid-19 vei a ni tih September 1, 2021 khan hmuh chhuah niin, a thih hma ni, September 8 khan SRH-ah dah luh a ni.