COVID-19: Mizoram dinhmun ; Hripui vei 1,061 hmuh belh a ni

September 8, Nilaini khan Mizoramah Covid-19 vei mi 1,061 hmuh chhuah a ni a, a záwnin ni thum chhung sang khat chuang hmuh chhuah a ni tawh. Nimin khan hripui vei dam tawh mi 622 chhuahtir an ni a, hripui vei thi pahnih an awm belh.

Covid-19 vei Sep­t. 8-a hmuhte chu mipa 486 leh hmei­chhia 575 an ni a; ZMC laboratory-a hmuh chhuah 132, TrueNAT-PCR hmanga hmuh 70, RAT hmanga hmuh 834 leh Fluorescent Immunoassay (FIA) hmanga hmuh 25 an ni.

Hripui vei hmuh chhuah thar mi 1,061-te chu symptom nei 519 leh nei lo 542 an ni a; tual­chhunga kái 1,059 leh state pawn aṭanga lut pa­hnih niin, tualchhunga kái zingah kàina chin hriat loh 451 an awm.

IDSP record angin, Mizoramah Covid-19 vei 67,971 hmuh chhuah a ni tawh a, mipa 34,407 leh hmeichhia 33,564 an ni. Nimin tlai dar 5 thleng khan mi 56,060 (82.48%) chhuahtir an ni tawh a, mi 230 (0.34%) thi tawhin, enkawl mek mi 11,681 (17.18%) an awm.

September 8, Nilainia sample endik dan chu - ZMC laboratory-ah 1,580 (Aizawl 1,578 & Kolasib 155), TrueNAT hmangin district 10-ah 644, RAT hmangin district 11-ah 8,159 leh FIA hmangin 91 a ni a; a vaiin sample 10,474 a ni. Sample endik aṭanga hripui vei hmuh chhuah 1,061 chu 10.13% a ni a; ZMC-ah 8.35%, TrueNAT-ah 10.87%, RAT-ah 10.22% leh FIA-ah 27.47% a ni.

District tinah Covid-19 vei hmuh chhuah a ni a; Aizawl district-ah mi 537, Siahaah 95, Kolasib-ah 74, Lungleiah 72, Champhaiah 70, Serchhipah 61, Lawngtlaiah 57, Khawzawlah 45, Mamitah 37, Hnahthialah 11 leh Saitual district-ah mi pahnih hmuh chhuah a ni.

Hripui vei hmuh thar mi 1,091 zingah nausen kum khat tling lo 10 an tel a, an zinga paliin symptom an nei. Kum 70 tling tawh mi 26 telin, a upa ber chu kum 91 a ni a, a zatvein symptom an nei.

September thla ni riat chhungin Covid-19 positive mi 7,971 hmuh chhuah a ni a, chawhrualin ni tin mi 996 chuang hret (996.38) hmuh chhuah an awm ang a ni. Mizorama Covid-19 vei hmuh tawh 67,971 chu kum 2011 chhiarpui angin, mi 1,000 zelah hripui vei mi 62 an awm ang a ni bawk.

Nimin khan tlai dar 5 thlengin hripui vei dam tawh mi 622 chhuahtir an ni a; Aizawl district-ah mi 412, Mamit district-ah 81, Champhai district-ah 40, Kolasib district-ah 31, Lawngtlai district-ah 30, Lunglei district-ah 25, Saitual district-ah pahnih leh Hnahthial district-ah mi pakhat an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 14,964 hmuh chhuah a ni tawh a, TrueNAT-PCR hmangin 3,854, RAT hmangin 48,985, FIA hmangin 167 leh Guwahati-ah pakhat hmuh chhuah a ni tawh.

IDSP tarlan danin, September 8, 2021 thlengin Mizoramah swab sample 9,39,297 endik a ni tawh a, chu'ng aṭanga Covid-19 vei hmuh tawh zat 67,971 chu 7.24% a ni. Hripui vei hmuh tawh zinga mi 63,579 chu Mizoram chhunga kái chhâwng an ni a, mi 4,392 chu Mizoram páwn aṭanga an rawn luh hnua hmuh chhuah an ni.